Dárigerler Denge bezgegin juqtyrǵandardyń jaǵdaıy týraly aıtty
ALMATY. QazAqparat - Almaty dárigerleri Denge bezgegin juqtyrǵan 4 patsıenttiń ahýaly týraly aıtty, dep habarlaıdy QazAqparat tilshisi.
Qalalyq Qoǵamdyq densaýlyq saqtaý basqarmasynyń baspasóz qyzmeti habarlaǵandaı, naýqas adamdardyń jaǵdaıy jaqsaryp keledi.
«Eki patsıent I.Jekenova atyndaǵy juqpaly aýrýlar aýrýhanasynda emdelip shyqty. Qalǵan ekeýi ambýlatorııalyq em qabyldady. Barlyq naýqastarda asqyný bolǵan joq. Olardyń barlyǵy Taıland elinde demalyp kelgen. Boljam boıynsha qozdyrǵyshty masalardan juqtyrǵan», - dedi baspasóz qyzmeti.
Mamandardyń aıtýynsha, Denge bezgegi dene qyzýynyń kóterilýi, bulshyqettiń aýyrýy, býyndardyń qaqsaýymen, bórtpelerdiń shyǵýymen erekshelenedi.
Gemorragııalyq bezgekter (onyń ishinde Denge bezgegi) - ótkir vırýstyq ınfektsııalyq aýrý.
Qozdyrǵyshtardy naýqas adamdar, maımyldar, jarqanattar, masalar taratýy múmkin. Bul aýrý jyly klımat aımaqtarda Azııanyń Ońtústiginde, muhıt elderinde, Afrıka, Amerıka, Karıb basseıni elderinde taralǵan. Mamandar bul aýrýdy juqtyrmas úshin masalardyń shaǵýynan qorǵaıtyn arnaıy krem jaǵyp júrýge keńes beredi.
Buǵan deıin bıyl Almatyda 4 týrıstiń aýrý juqtyryp kelgenin habarlaǵan bolatynbyz.
