Dárigerler denesin 80% kúıik shalǵan astanalyq órt sóndirýshiniń ómirin saqtap qala almady
ASTANA. QazAqparat – Qyzmet kezinde denesiniń 80 paıyzyn kúıik shalǵan órt sóndirýshi Asqar Zabıkýlın aýrýhanada jan tapsyrdy, dep habarlaıdy QazAqparat tilshisi.
«Búgin aýrýhanada jatqan órt sóndirýshi Asqar Zabıkýlın qaıtys boldy. Onyń ómirin aman alyp qalý úshin dárigerler birneshe táýlik boıy aıanbaı eńbek etti. Asqar Astana qalasynda bolǵan órt kezinde adamdardyń ómirin qutqarý kezinde batyrlyq tanytty. Tótenshe jaǵdaılar mınıstrliginiń ujymy Asqar Zabıkýlınniń týǵan-týystaryna, jaqyndaryna qaıǵyra kóńil aıtady. Ol óz isiniń mamany retinde jadymyzda máńgi qalady», - dedi QR Tótenshe jaǵdaılar mınıstrliginiń resmı ókili Rýslan Imanqulov.
Órt sóndirýshiniń artynda joldasy men 2 balasy qaldy.
«Asqar aqjarqyn adam, jaýapty qyzmetker, kásibı órt sóndirýshi jáne saýatty maman boldy. Áriptesteri arasynda ádil, óz mamandyǵyn súıetin qyzmetker retinde qurmetke ıe. Asqardyń áıeli men eki balasy qaldy. Tótenshe jaǵdaılar mınıstrligi qaıtys bolǵan órt sóndirýshiniń otbasyna jan-jaqty kómek kórsetedi», - dedi resmı ókil.
Aıta keteıik, elordada kópqabatty úıde órt bolyp, 3 adam, onyń ishinde 1 bala aýrýhanaǵa tústi.
Al 3 adamdy qutqarǵan astanalyq órt sóndirýshi Asqar Zabıkýlındi 80% kúıik shalyp, jansaqtaý bólimine jatqyzyldy. Sondaı-aq, oǵan dostary kómek jınady.Odan bólek, Memleket basshysy erlik kórsetken jáne birneshe adamnyń ómirin qutqarǵan elordalyq órt sóndirýshilerdi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy.
Kúni keshe, onyń otbasyna úsh bólmeli páterdiń sertıfıkaty tabystalǵan bolatyn.
