Dárigerler D dárýmeni men qaterli isik ólimi arasyndaǵy baılanysty anyqtady
ASTANA. QazAqparat - Ǵalymdar aǵzadaǵy D dárýmeni deńgeıi men júrek-qantamyry aýrýlary jáne qaterli isiktiń keı túrleri arasynda baılanystyń bolatynyn anyqtady, dep jazady Gazeta.ru.
BMJ jýrnalyndaǵy derek boıynsha, D dárýmeniniń deńgeıi qaterli isikten ólý qaýpin boljaýǵa kómektesedi eken.
Bul tujyrym jalpy sany 26 myń adamnan turatyn eýropalyq jáne amerıkalyq turǵyndardyń 7 tobyna júrgizilgen zertteý nátıjesinde shyǵaryldy. Zertteýge qatysýshylardyń jasy 50-79 aralyǵynda. Dárigerler olarǵa 16 jyl boıy baqylaý júrgizgen.
D dárýmeniniń deńgeıin ólsheý adamnyń jasyna baılanysty emes ekenin kórsetken. Biraq áıelderde ortasha eseppen erkekterge qaraǵanda deńgeıi tómenirek bolyp keledi eken. Sondaı-aq, D dárýmeniniń deńgeıi dene qozǵalysy joǵary adamdarda jáne joǵary bilimdi azamattarda joǵaryraq, al semiz kisilerde tómenirek bolyp keledi-mis.
Biz biletindeı, D dárýmeni teri astynda kún nurynyń qýatymen paıda bolady.
16 jylda baqylaýdaǵy 7 myńdaı adam qaıtys bolǵan. Qaza bolǵandardyń kóbi júrek qan tamyrlary aýrýlarynan ólim qushqan da, oǵan qaraǵanda azyraǵynyń ajaly qaterli isikten bolǵan. Osylaısha, ǵalymdar D dárýmeniniń tómen deńgeıi men júrek qan tamyrlary aýrýlarynan keletin ólim jáne qaterli isiktiń arasynda baılanysty anyqtady.
Qorytyndy boıynsha, dárigerler D dárýmeniniń deńgeıi joǵaryda aıtylǵan dertterden ólý qaýpin anyqtaý kórsetkishi dep sanaıdy. Biraq, qaterli isiktiń ózi D dárýmeniniń deńgeıin azaıtýy múmkin degen de qaýip bar. Bundaı jaǵdaıda zertteý nátıjesi negizsiz bolyp tabylady.
