Dárigerler bosanǵan áıeldi Pavlodarǵa jetkize almaı jatyr
PAVLODAR. QazAqparat - Ertis aýylynda dárigerler júktiliginiń 30-shy aptasynda bosanǵan anany Pavlodar oblystyq perınataldyq ortalyǵyna jetkize almaı jatyr, dep habarlaıdy «QazAqparat» HAA.
«Jedel járdem kóligi qar men boran qursaýynda tur. Jol kórinbeıdi, aýylda jaryq joq. Júkti áıelge tańerteń ota jasaldy, bala júktiliktiń 30-shy aptasynda dúnıege keldi. Olardy oblys ortalyǵyna jedel jetkizý kerek», - dep málimdedi agenttik tilshisine densaýlyq saqtaý organdaryndaǵy aqparat kózi.
Málimetke sáıkes jedel járdem aýylǵa áreń jetken. Endi keıin qaıtý úlken qıyndyq bolyp otyr.
«Qazir ol jerge jedel qyzmet ókilderi tartylǵan. Traktorlar da kómekke kelgen. Boran óte qatty», - dedi medıtsına qyzmetkerleri.
