Dárigerler beti kúıip qalǵan jedel járdem júrgizýshisiniń jaǵdaıyn aıtty
ALMATY. QazAqparat - Almaty dárigerleri beti kúıip qalǵan jedel járdem júrgizýshisiniń jaǵdaıy týraly aıtty, dep habarlaıdy QazAqparat tilshisi.
Patsıent 12 jeltoqsanda №4 aýrýhananyń kúıik bólimine 1-2 dárejeli hımııalyq kúıik dıagnozymen tústi. Dárigerler onyń jaǵdaıyn ortasha dep baǵalaǵan bolatyn.
«Qazirgi tańda jaǵdaıy jaqsaryp keledi. Naýqasqa tegin memlekettik medıtsınalyq kómek berý kólemi aıasynda keshendi kómek kórsetilip jatyr. Jarasy jazylǵan soń ambýlatorııalyq em qabyldaýǵa emhanaǵa shyǵarylady», - dedi №4 aýrýhananyń kúıik bóliminiń meńgerýshisi Nurjan Bınokýrov.
Eske salsaq, oqıǵa keshe Jetisý aýdanynda Vınter kóshesinde bolǵan. Er adam jedel járdem júrgizýshisinen kóligin joldan alýdy suraǵan. Oǵan kelispegen júrgizýshiniń betine gaz ballonyn qaratyp, shashyp jibergen. Sonyń saldarynan júrgizýshi 1-2 dárejelei hımııalyq kúıik dıagnozymen aýrýhanaǵa tústi.
Almaty polıtsııasy jedel járdem júrgizýshisine gaz ballonymen shabýyl jasaǵan adamdy ustady. Jetisý aýdandyq ІІB osy oqıǵaǵa baılanysty QR QK 293-baby boıynsha sotqa deıingi tergeý jumystaryn bastady.
Buǵan deıin de, Almatyda joldy bólise almaǵan Túrkııa azamaty jedel járdem júrgizýshisi Nıkolaı Kýchmany soqqyǵa jyqqan bolatyn.
Kóp uzamaı polıtseıler 1990 jyly týǵan túrkııalyq azamatty anyqtap, ýaqytsha ustaý oqshaýlaǵyshyna jetkizdi.
Keıin Álı Demır kepilmen bosatyldy. Sondaı-aq, jedel járdem júrgizýshisi Túrkııa azamatyn keshirdi.
