Dárigerler batýttan qulaǵan balanyń biri komaǵa tústi degen aqparatty joqqa shyǵardy
ASTANA. QazAqparat - №2 qalalyq balalar aýrýhanasynyń bas dárigeri Birjan Dosmaıylov elordada jel ushyrǵan batýttan zardap shekken qyz balanyń komaǵa túskeni týraly aqparatty joqqa shyǵardy, dep habarlaıdy QazAqparat tilshisi.
«Bul jaı ǵana sybys. Dese de, úsh bala aýyr jaǵdaıda bolǵan edi. Sondyqtan, olar jansaqtaý bóliminde jatty. Jansaqtaý bóliminde áli de bir qyz bala jatyr», - dedi Birjan Dosmaıylov búgingi baspasóz máslıhatynda.
Ol óz sózinde balalardyń barlyǵynda kóptegen jaraqattar (polıjaraqat) bolǵanyn aıtyp ótti.
«Qandaı bir boljam jasaý - orynsyz bolar edi. Balalardyń qamyn bárimiz oılap otyrǵandyqtan, eshteńe dep boljam jasaǵym kelmeıdi. Ákimdik pen Densaýlyq saqtaý basqarmasynyń qoldaýymen biz barynsha qoldan kelgendi jasap jatyrmyz», - dedi bas dáriger.
Sonymen birge, baspasóz máslıhaty barysynda bas dáriger sheteldik mamandarmen de keńes júrip jatqanyn aıtty.
«Iá, sheteldik mamandarmen dál neırojaraqttar týrasynda keńes júrgizildi. Qazirgi kúnge deıin olarmen onlaın-rejimde keńes júrgizilip jatyr. Balalar aýrýhanadan shyqqanǵa deıin báribir baqylaýda bolady. Bul tipti talqylanbaıdy. Ol jalpyǵa ortaq praktıka», - deıdi ol.
Eske sala ketsek, 4 mamyrda elordada «Jannur» saýda úıi aýmaǵyndaǵy batýtty qatty jel ushyryp, 5 bala zardap shekken bolatyn.
Batýt kúrdeli konstrýktsııaly bolǵan, jalpy aýdany 200-250 sharshy metr. QR ІІM Tótenshe jaǵdaılar komıteti ata-analarǵa óz balalarynyń taǵdyryna jaýapkershilikpen qaraýǵa shaqyrdy. Sebebi ata-analar aýa raıynyń qolaısyzdyǵyn kóre tura olardy batýtqa oınaýǵa jibergen.
Odan keıin belgili bolǵandaı «Jannurdaǵy» jaǵdaıdan soń elimizdegi barlyq attraktsıondar tekserilgeli jatyr.
Al Astana qalasynyń ákimi Áset Isekeshev zardap shekken balalardyń hal-jaǵdaıyn bilý maqsatynda qalalyq №2 balalar aýrýhanasyna baryp, kinálilerdiń jazaǵa tartylatyndyǵyn aıtqan bolatyn.
