Dárigerler batýttan qulaǵan bala týraly: Qyz bala adamdardy tanyp, sóıleı bastady
ASTANA. QazAqparat - Elordadaǵy №2 qalalyq balalar aýrýhanasynyń bas dárigeri Birjan Dosmaıylov elordada batýttan qulap, jansaqtaý bólimine túsken qyz balanyń jaǵdaıy týraly aıtyp berdi, dep habarlaıdy QazAqparat tilshisi.
Aıta ketsek, Birjan Dosmaıylov munyń aldynda batýttan qulaǵan balalardyń ekeýi búgin jansaqtaý bóliminen shyǵarylǵanyn habarlaǵan bolatyn.
Qazirgi ýaqytta bir qyz bala áli de atalmysh bólimde jatyr.
«Balalarǵa qoldan kelgenshe járdem berip jatyrmyz. Jansaqtaý bóliminde jatqan qyz bala bas-mı jaraqatyn alǵandyqtan - baqylaýda. Qazir ol bala sóılesip, adamdy tanyp jatyr», - dedi Birjan Dosmaıylov №2 qalalyq balalar aýrýhanasynda ótken baspasóz máslıhatynda.
Sonymen birge, baspasóz máslıhaty barysynda bas dáriger sheteldik mamandarmen de keńes júrip jatqanyn aıtty.
«Iá, sheteldik mamandarmen dál neırojaraqattar týrasynda keńes júrgizildi. Qazirgi kúnge deıin olarmen onlaın rejimde keńes júrgizilip jatyr. Balalar aýrýhanadan shyqqanǵa deıin báribir baqylaýda bolady. Bul tipti talqylanbaıdy. Ol jalpyǵa ortaq praktıka», - deıdi ol.
Eske sala ketsek, 4 mamyrda elordada «Jannur» saýda úıi aýmaǵyndaǵy batýtty qatty jel ushyryp, 5 bala zardap shekken bolatyn. Batýt kúrdeli konstrýktsııaly bolǵan, jalpy aýdany 200-250 sharshy metr.
QR ІІM Tótenshe jaǵdaılar komıteti ata-analardy óz balalarynyń taǵdyryna jaýapkershilikpen qaraýǵa shaqyrdy. Sebebi ata-analar aýa raıynyń qolaısyzdyǵyn kóre tura olardy batýtqa oınaýǵa jibergen.
Odan keıin belgili bolǵandaı «Jannurdaǵy» jaǵdaıdan soń elimizdegi barlyq attraktsıondar tekseriledi.
Astana qalasynyń ákimi Áset Isekeshev zardap shekken balalardyń hal-jaǵdaıyn bilý maqsatynda qalalyq №2 balalar aýrýhanasyna baryp, kinálilerdiń jazaǵa tartylatyndyǵyn aıtqan bolatyn.
