Dárigerler baspaldaqtan qulap es-tússiz qalǵan oqýshysynyń jaǵdaıy týraly aıtyp berdi
ÓSKEMEN. QazAqparat - Baspaldaqtan qulap, komaǵa túsip qalǵan Zyrıanov aýdanyndaǵy orta mekteptiń 3 «B» synyp oqýshysy Erlan Nurdybaevtyń jaǵdaıy birqalypty. Bul týraly «QazAqparat» HAA tilshisine Óskemendegi Ana men bala ortalyǵy neırohırýrgııa bóliminen habarlaǵan.
Emdeýshi dáriger Talant Arystambekovtyń aıtýynsha, Erlanǵa jazylyp berilgen emdeý protsedýralary tolyq kólemde oryndalyp jatyr. «Oqýshynyń jaǵdaıyna eshqandaı qaýip tónip turǵan joq», - dedi neırobólimniń emdeýshi dárigeri.
Eske salaıyq , Zyrıanovtaǵy № 1 mekteptiń bastaýysh synybynda bilim alyp jatqan úshinshi synyp oqýshysy sabaq aıaqtalǵannan keıin baspaldaqpen túsip bara jatyp, birinshi jáne ekinshi qabattyń aralyǵynan qulap ketken. Oǵan balalar, ulyn alyp ketýge kelgen ákesi men mektep medbıkesi júgirip kelip, jedel járdem shaqyrǵan. Jansaqtaý bólimine alyp bara jatqanda bala komaǵa túsken.
Jaǵdaıy aýyr balany tasymaldaý múmkin bolmaǵandyqtan Óskemendegi oblystyq Ana men bala ortalyǵynan mamandar shaqyrtyldy. Ekinshi táýlikte ul bala sanıtarlyq avıatsııanyń tikushaǵymen Óskemendegi ortalyqqa jetkizildi.
