Dárigerler barlyq naýqasqa jetpeı̆di – Altaı Kólginov elorda turǵyndaryna úndeý jasady
NUR-SULTAN. QazAqparat – Nur-Sultan qalasynyń ákimi Altaı Kólginov COVID-19 juqtyrý jaǵdaılarynyń kóbeıýine baılanysty astanalyqtarǵa úndeý jasady, dep habarlaıdy QazAqparat tilshisi.
«COVID-19 indetin juqtyrý jaǵdaı̆larynyń kóbeıýine baı̆lanysty qala «sary» aı̆maqqa ótti. Bul qazirgi kezeńde karantındi jeńildetý qajet emes ekenin bildiredi. 11 qarashada 47 jaǵdaı̆ tirkeldi. Shaǵyn jáne orta bıznes nysandary kezek-kezekpen jabylmaýy, qala aýmaǵy boı̆ynsha blokpostar ornatylmaýy jáne qalanyń jabylmaýy úshin ár turǵyn jaǵdaı̆dyń qanshalyqty qıyn ekenin túsinýi kerek. Jedel shtab otyrysynda negizgi máseleler qaraldy», - dep jazdy ákim Instagram áleýmettik paraqshasynda.
Ákimniń aıtýynsha, eń aldymen polıtsııa qyzmetkerleri men sanıtarlyq dárigerler reı̆dterdi kúsheı̆týge jáne karantındi buzý faktilerin anyqtaýǵa kóshti. Bul sanıtarııa erejelerin saqtamaı̆, búkil qalanyń ómirine qaýip tóndiretin nemquraı̆ly kásipkerler úshin sıgnal bolýy shart.
«Túnde oı̆yn-saýyq mekemelerinde júrgen, ereje buzǵan azamattar ásirese egde jastaǵy turǵyndardyń densaýlyǵyna qanshalyqty keri áserin tıgizip jatqandaryn áli túsinbeı̆ keledi. Ekinshiden, medıtsına mekemeleri qosymsha jabdyqtarmen, qorǵanys quraldarymen, dári-dármektermen jáne t.b. jabdyqtalǵan. Materıaldyq-tehnıkalyq baza daı̆yn, biraq bir mezette jaǵdaı̆ ýshyǵyp ketse, dárigerler barlyq naýqasqa jetpeı̆di», - dep eskertti A. Kólginov.
Úshinshiden, PTR zertteýimen kóbirek qamtý úshin kópbeı̆indi qalalyq aýrýhanalardyń qabyldaý bólmelerinde jáne statsıonarlardyń akýsherlik bloktarynda ızotermııalyq shaǵyn-zerthanalar ashyldy. Bul shuǵyl túrde túsken patsıentter arasynda koronavırýs ınfektsııasyn tasymaldaýshylaryn anyqtaýǵa jáne ýaqtyly em kórsetýge múmkindik beredi.
Tórtinshi, KVI-ǵa bıomaterıal alatyn zerthanalar sany 15-ke deı̆in artty. Zerthanalardyń jalpy qýaty táýligine 10 myńnan astam zertteýge jetedi.
Besinshiden, barlyq qalalyqtarǵa qyzmet kórsetetin avtobýs parkteri, shahardy sanıtarlyq tazalaýmen jáne abattandyrýmen aı̆nalysatyn kommýnaldyq kásiporyndar jáne qalanyń tynys-tirshiligin qamtamasyz etetin mańyzdy nysandar (JEO, Astana sý arnasy, Astana-AEK jáne t.b.) erekshe baqylaýǵa alyndy. Qyzmetkerler jıi tekserilip otyrady.
«Testileý arqyly qamtýdy keńeı̆te otyryp, biz COVID-19 taralýynyń naqty kórinisin baǵamdaımyz jáne oshaqtardy tez arada oqshaýlaı̆ alamyz. Shetelden indet juqtyryp, elge oralǵandar sany artyp keledi. Múmkindiginshe saparlar sanyn qysqartýǵa, jappaı is-sharalardy ótkizbeýge jáne qatyspaýǵa, sanıtarııa normalaryn qatań saqtaýǵa keńes beremiz», - deıdi Altaı Kólginov.
