Dárigerler balalardy sýburqaqtarǵa jibermeýge keńes berdi
ASTANA. QazAqparat - Pavlodar oblysynda 2018 jyldyń alty aıy ishinde úsh bala serrozdy menıngıt juqtyrǵan, dep habarlaıdy pavlodarnews.
Bul týraly óńirlik kommýnıkatsııalar qyzmetinde ótken baspasóz máslıhatynda oblystyq qoǵamdyq densaýlyqty saqtaý departamentiniń basshysy, Pavlodar oblysynyń bas memlekettik sanıtarııalyq dárigeri Irına Sorokına aıtty.
«Aımaqta menıngokkokty ınfektsııalar boıynsha epıdemıologııalyq jaǵdaı turaqtaldy. Menıngıt - bul mı men julynnyń jumsaq qabyqtarynyń qabynýy. Іrińdi jáne uıyma bolyp bólinedi. Pnevmokokk, gemofıldi taıaqsha sııaqty aýyr ınfektsııalardyń keń taraǵan qozdyrǵyshy bolyp tabylady. Kóbinese bes jasqa deıingi balalar arasynda kezdesedi. Ásirese, jazǵy shomylý maýsymynda serrozdy menıngıt juqtyrý qaýipi joǵary bolady. Sondyqtan balalardy ashyq sý aıdyndary men ózenderge, sýburqaqtarǵa jibermegen durys. Sebebi, sapasy kúmándi sýdyń astynda júrgen kezde túrli vırýsty juqtyrýy múmkin», - deıdi Irına Sorokına.
Departament usynǵan málimetke súıensek, óńirde 2014 jyly serrozdy (vırýsty) menıngıttiń 296 oqıǵasy, 2016 jyly - 50, 2016 jyly - 51 jáne 2017 jyly 12 jaǵdaı tirkelgen. Kóptegen jaǵdaıda menıngıt enterovırýsy syrtqy ortaǵa óte tózimdi, ıaǵnı sý qubyrlarynda 18 kúnge deıin, ózenderde bir aıdaı jáne tazartylǵan sý kózderinde shamamen eki aı ómir súredi.
Bas memlekettik sanıtarııalyq dáriger menıngıttiń aldyn alý úshin jeke bas gıgıenasyn saqtaýǵa keńes berdi.
«Aýrýdy ártúrli jastaǵy adamdar juqtyrýy múmkin. Biraq, kóbinese balalar jıi shaldyǵady. Ásirese, jaz-kúz kezeńinde saqtyq tanytqan jón. Vırýsty menıngıt joǵary qyzýdan bastalady. Birinshi-ekinshi kúnderi basylmaıtyn qatty bas aýrýy, qusý, álsizdik, keı kezderi sergektik pen qozý baıqalady. Jótel, murynnyń bitelýi, tamaq pen ishtiń aýyrýy múmkin. Sondyqtan tek qaınatylǵan sý iship, balalardy shomylý kezinde sýdy ishpeýge úıretý qajet. Sondaı-aq, qarapaıym jeke gıgıena erejelerin esten shyǵarmaǵan abzal. Kókónis pen jemis-jıdekti jýyp, ǵımarattardy jeldetý, dezınfektsııalyq, jýý quraldarynyń kómegimen ylǵaldy tazalaý júrgizý qajet» - deıdi Irına Sorokına.
Eske sala keteıik, Pavlodar oblysynda bıylǵy jyly qańtar jáne mamyr aılarynda eki bala menıngokok juqpasyna shaldyqqan. Bir jáne jeti jastaǵy eki bala statsıonarda em qabyldap, tolyǵymen aýrýdan aıyǵyp shyqty. Búldirshindermen baılanysta bolǵan 208 adam tekserilgen.
