Dárigerler aıanyp qalǵan joq: koronovırýstan jazylyp shyqqan turǵyn
Munaıly aýdany Basqudyq aýylynyń turǵyny Aıtbaı Atabaevtyń dene qyzýy kóterilgen soń jedel járdem brıgadasyn shaqyrtýǵa týra kelgen. Provızorlyq statsıonarda em alyp jatqanyna bir apta boldy. Bıyl alpystyń jeteýine tolǵan. Ol dárigerlerge sapaly medıtsınalyq kómek kórsetkeni úshin alǵysyn bildirdi. Sonymen qatar jyly shyraı tanytyp, úıdegideı kútim jasaǵan tehnıkalyq qyzmetkerler men medbıkelerge de erekshe rıza ekendigin aıtady. Qaı-qaısysy da qurmet pen maqtaýǵa laıyq degen pikirde.
«Úıde otyrǵanymda kenetten jaǵdaıym nasharlaı tústi. Sol sebepti jedel járdem brıgadasyn shaqyrtýǵa týra keldi. Dene qyzýym 39-dan túspedi. Tipti aıaǵymdy basa almaı qaldym. Densaýlyq – basty baılyq. Bul rette aq halatty abzal jandardyń eńbegin atap ótpeske bolmaıdy. Qazaq eli tezdetip osy indetten qutylsa degen tilegim bar. Betperde kıip júrgen durys, halyq kóp shoǵyrlanatyn oryndarǵa barýdy azaıtqan jón dep oılaımyn. Aýrýhanada em alyp qazir táýir boldym. Dárigerler aıanyp qalyp jatqan joq», - deıdi Aıtbaı Atabaev.