Dárigerler aýyr haldegi kópbalaly ananyń ómirine arasha tústi
KÓKShETAÝ. QazAqparat - Astanadaǵy №2 Aqmola oblystyq aýrýhanasy dárigerleriniń shıraq qımylynyń arqasynda 36 jastaǵy kópbalaly ana ajal aýzynan qaldy, dep habarlaıdy QazAqparat tilshisi Aqmola oblysynyń «Áleýmettik medıtsınalyq saqtandyrý qory» KEAQ baspasóz qyzmetine silteme jasap.
Vedomstvonyń dereginshe, aǵymdaǵy jyldyń 14 qańtarynda Astanadaǵy №2 Aqmola oblystyq aýrýhanasyna Stepnogor qalasynan sanıtarlyq avıatsııa jelisi arqyly merziminen buryn bosanǵan aýyr haldegi kelinshek jetkizilgen.
Naýqastyń haliniń nasharlaýyna júktiliktiń aýyr asqynýy sebep bolǵan. Sondyqtan, joǵary bilikti mamandardyń kómegi qajet boldy. Osy oraıda Aqmola oblysynyń densaýlyq saqtaý basqarmasy jedel kómek kórsetý maqsatynda oblystyń jetekshi mamandarynan brıgada jasaqtady.
«№2 Aqmola oblystyq aýrýhanasynyń dárigerleri Ana men bala ulttyq ǵylymı ortalyǵy, Astana medıtsınalyq ýnıversıtetiniń akýsherlik jáne gınekologııa kafedrasynyń mamandarymen keńese kele, HELLP-sındrom - júktiliktiń aýyr asqynýy kelinshektiń ómirine qaýip tóndirgenin rastady. Búırek jetispeýshiligi, trombotsıtter kórsetkishiniń azdyǵy, kóp qan joǵaltý, tynys alý jetispeýshiligi, joǵary arterıaldy qysym degen birneshe dıagnoz qoıyldy. Jansaqtaý bólimindegi mamandardyń kásibı sheberliginiń arqasynda kópbalaly ana aman qaldy. Statıstıka boıynsha, júktiliktiń aýyr asqynýyna ushyraǵan áıelderdiń 75 paıyzy kóz jumady», - deıdi №2 Aqmola oblystyq aýrýhanasy bas dárigeriniń orynbasary Aıgúl Qojaǵaparova.
Vedomstvo keltirgen málimetterge qaraǵanda, búgingi tańda naýqastyń ómirine eshqandaı qaýip tónip turǵan joq. Jas ana men nárestesiniń jaǵdaıy qanaǵattanarlyq. Aýrýhanadan shyǵarylyp, úılerine jiberildi.
«Sanıtarlyq avıatsııa, aýrýhana mamandaryna shyn júrekten alǵys aıtam. Sizderdiń kásibı sheberlikterińizdiń arqasynda joldasym aman qaldy. Jeti balamyz bar, tuńǵyshymyz - 14 jasta, kenjemiz - 1 jasta. Sizder balalaryma anasyn qaıta syılaǵandaı boldyńyzdar. Sol úshin sizderge kóp rahmet», - dep rızashylyǵyn bildirdi kópbalaly áke Jánibek Honaı.
