Dárigerler Atyraý oblysyndaǵy jataqhana órtinen zardap shekkenderdiń jaǵdaıyn aıtty
ATYRAÝ. QazAqparat - Atyraý oblystyq Densaýlyq saqtaý departamentiniń baspasóz qyzmeti búgin jataqhanada shyqqan órtten zardap shekken tórt adamnyń jaǵdaıy týraly málim etti, dep habarlaıdy «QazAqparat» HAA tilshisi.
«Zardap shegýshilerdiń biri óte aýyr halde jatyr. Denesiniń 65-70 % kúıik shalǵan. Ol jansaqtaý bóliminde. Bir adamnyń qoly men tynys alý joldaryn kúıik shalǵan. Taǵy eki adamǵa kómek kórsetilip, ambýlatorlyq emdeýge jiberildi», - dep habarlady Departamenttiń baspasóz qyzmetinen.
Oblystyq aýrýhanada zardap shegýshilerge kómek kórsetý boıynsha arnaıy dárigerler toby uıymdastyryldy. Barlyq dári-dármekter jeterlik, dep naqtylady Densaýlyq saqtaý departamentinen.
Buǵan deıin habarlaǵanymyzdaı, Atyraý qalasynan shamamen 40 shaqyrym jerdegi Qyzylqoǵa aýdanynda salynyp jatqan Qarabatan «Gaztýrbınalyq elektr stansysynyń» qurylys aýmaǵynda ornalasqan jataqhana órtendi. 6 adam qaza bolyp, 4-eýi zardap shekti.
