Dárigerler Astanada jaraqattanǵan oqýshy týraly aıtty
ASTANA. QazAqparat - №2 qalalyq aýrýhana 2 naýryzda túsken naýqas jaıynda aqparat berdi, dep habarlaıdy QazAqparat.
Oqýshy aýrýhananyń qabyldaý bólimine jedel járdem brıgadasymen shuǵyl túrde saǵat 19:45 kezinde jetkizildi. Balanyń kókirek qýysynyń oń jáne sol jaǵyna úshkir zatpen keltirilgen tereń emes birneshe jaraqaty bolǵan. Sonymen qatar osyndaı jaraqattar oqýshynyń belinde baıqalǵan.
«Ony jetkizgen kezde alǵashqy medıtsınalyq kómek kórsetildi. Qazirgi kezde zardap shegýshi oqýshynyń densaýlyq jaǵdaıy qanaǵattanarlyq deńgeıde», - delingen Astana qalasy densaýlyq saqtaý basqarmasynyń habarlamasynda.
Esterińizge sala keteıik, elordadaǵy Oqýshylar saraıy aýmaǵynda bı keshinen keıin 11 synyp oqýshysy jaraqat aldy. Kúdikti adam anyqtalyp, ustaldy. Qazirgi kezde sotqa deıingi tergeý amaldary júrip jatyr.
