Dárigerler Astana turǵynyn múgedektikten saqtap qaldy
Áleýmettik medıtsınalyq saqtandyrý qory Astana qalasy fılıalynyń málimetinshe, naýqasqa «oń jaq stereotaktıkalyq talamotomııa» otasy jasaldy. Basqasha aıtqanda, bas súıegi arqyly mıdyń ortasyna tereń enip, sýbtalamıkalyq ıadroǵa tok ótetin kishkentaı elektrodtar engizildi.
«Qurylǵy aýrýdan zardap shekken mı jasýshalarynyń jumysyn tereń yntalandyrady. Impýlstar mıdyń zaqymdalǵan bólikterine tikeleı enip, olardyń qyzmetin tezdetedi. Osylaısha, Parkınson aýrýynyń belgilerin jeńildetýge múmkindik beredi jáne onyń aǵymyn baıaýlatady. Ota kvota boıynsha, MÁMS aıasynda jasaldy» – dep jazdy vedomstvodan.
Naýqastyń aıtýynsha, ol 2016 jyldan beri parkınson dertimen aýyryp keledi. Osy ýaqyt ishinde er adam únemi neırohırýrgııa ortalyǵynyń mamandarynan keńes alyp turdy, tamyrly jáne fýnktsıonaldy neırohırýrgııa bólimi mamandarynyń baqylaýymen uzaq ýaqyt boıy dári-dármekter arqyly em (túzetý terapııasyn) aldy. Biraq naýqastyń jaǵdaıy jaqsarmady, qımyl-qozǵalys fýnktsııalary buzyla bastady, qoldary múldem «tyńdamaıtyn» boldy. Eki qoly qatty dirildeıtini sonshalyq, kúndelikti ómirinde kedergi keltirdi, bulshyq etteri ıkemge kelmeı, denesi siresip, qataıyp ketti. Hırýrgııalyq emniń oń áseri men qaýipti jaqtaryn tarazylaı kele, er adam ota jasatýǵa sheshim qabyldaıdy.
«Sońǵy kezderi osy aýrýǵa baılanysty kompıýterde jumys isteı almadym, bar zeıinimdi jumysqa aýdara almadym. Kún saıyn osy jaǵdaı meni tuıyqqa tireı bastady, sonymen qatar toqtaýsyz dirilden uıqym buzyldy. Otadan keıin ózimdi áldeqaıda jaqsy sezinemin. Diril endi mazalamaıdy. Soǵan óte qýanyshtymyn. Oń qolym da, sol qolym da tolyǵymen qalpyna keldi. Buǵan deıin sol qolym yrqyma múldem baǵynbaǵan kezde, dirildiń qatty bolǵany sonshalyq, ol oń qolyma da beriletin edi. Otadan keıin bári keremet», - dep bólisti naýqas.
