Dárigerler almatylyq áıeldiń jatyrynan 10 keliden asatyn isikti alyp tastady
ALMATY. QazAqparat - Almatydaǵy ortalyq klınıkalyq aýrýhana dárigerleri óte aýyr jaǵdaıda túsken 56 jastaǵy naýqasqa ota jasady, dep habarlaıdy QazAqparat tilshisi.
Aýrýhanaǵa óte aýyr jaǵdaıda túsken 56 jastaǵy naýqasqa jatyr mıomasy dıagnozy qoıyldy.
Jatyr isigi júktiliktiń 40-aptasyna sáıkes keldi. Іsiktiń kólemi ulǵaıǵany sonshalyqty, naýqastyń tynys alýy qıyndaǵan. Іsiktiń salmaǵy 10 keliden joǵary. Sonymen qatar, áıel tahıkardııa, qant dıabeti, qan qysymynyń tómendigi jáne basqa da sozylmaly aýrýlardan zardap shegip kelgen.
OQKA dırektorynyń orynbasary, qaýymdastyq professory Jasulan Baımahanov, onko-gınekolog Alısa Baınazarova, klınıka endokrınology Saltanat Shaıdarova jáne anastezıolog-reanımatologtar brıgadasy dárigerleri aqyldasa kelip, ota jasaý týraly sheshim qabyldady.
«Aýrýdyń klınıkalyq kórinisin, atap aıtqanda, jaqyn turǵan organdardyń qyzmetiniń buzylýyn eskere otyryp, ómirlik kórsetkishter boıynsha jatyrdy eksterpatsııalaý otasy jasaldy. Bul ota jatyr moıynyn alyp tastaý úshin jasaldy. Operatsııa eki saǵatqa sozyldy jáne sátti ótti. Qazir naýqas ózin jaqsy sezinedi, jaǵdaıy turaqty. Jaqyn arada arýhanadan úıine shyǵaramyz», - deıdi gınekolog dáriger Alısa Baınazarova.
Naýqas qazir ortalyq qalalyq klınıkalyq aýrýhananyń gınekologııa bóliminde em qabyldap jatyr.
«20 jyl buryn isik paıda boldy, basynda kishkentaı boldy, keıin bul túıirshik óse bastady. Men júregimdi teksertýge barsam, olar maǵan jatyrdy tekserý kerektigin aıtqan bolatyn. Biraq ol kezde men mán bermedim. 2021 jyly men koronavırýs ınfektsııasymen aýrýhanaǵa tústim. Dárigerler meni ýltradybystyq zertteýge túsirip, tolyq tekseristen ótkizgenen keıin mamandarǵa qaralýǵa keńes berdi. Biraq men taǵy mán bermedim. Al, ishimniń ósip jatqanyn salmaq qosyp, tolyp baramyn dep oıladym. Keıin qan ketti. Tek sol kezde ǵana men dárigerdiń kómegine júgindim. Maǵan MRT jasaǵan soń óte úlken kólemdegi mıoma bar ekenin jáne ony shuǵyl túrde otamen alyp tastaý kerek ekenin aıtty», - deıdi áıel.
Gınekolog Alısa Baınazarovanyń sózinshe, qazirgi ýaqytta jatyr isigi keń taraǵan dertke aınalǵan. Dáriger áıel adamdar aýyr dertke shaldyqpas úshin gınekolog mamandaryna jıi kórinip turýy kerek.
