Dárigerler Almatyda tabylǵan sportshy qyzdyń jaǵdaıy týraly aıtty
ALMATY. QazAqparat - Almaty dárigerleri ózin izdegenderden qashyp quzdan ushyp ketken sportshy qyzdyń hal-jaǵdaıy týraly aıtyp berdi, dep habarlaıdy QazAqparat tilshisi.
Sportshy qyz Anastasııa Smırnova Jedel medıtsınalyq kómek kórsetý aýrýhanasyna jetkizilgen.
«Boıjetkenniń tize tusynyń jumsaq tinderi, kókirek qýysy zaqymdalǵan. Aýrýhananyń qabyldaý bólimshesinde qajetti mamandar kómek kórsetti. Tekserý júrgizildi. Densaýlyǵyna qaýip týyp turǵan joq», - dedi qalalyq Densaýlyq saqtaý basqarmasy.
Aıta ketý kerek, Almatyda joǵalyp ketken 16 jastaǵy sportshy qyz taýdan tabylǵan bolatyn.
Semserlesýden sport sheberi Anastasııa Smırnova Nazar esimdi dosymen Almaty taýlarynda júrgen.
«Eriktilerdi kóre sala sportshy qyz taýdan sekirgen. Onyń artynan izdeý tobynyń jetekshisi Islam Ýgýshev te sekiredi. Ekeýi bıiktigi 15 metrdeı jartastan qulaǵanda Islam Anastasııany ustap úlgeredi. Biraq ekeýi de jaraqat alyp, Jedel medıtsınalyq kómek kórsetý aýrýhanasyna jatqyzyldy», - delingen habarlamada.
Aıta ketý kerek, sportshy qyz Qyrǵyzstandaǵy sporttyq jarystan kelgen soń dosymen kezdesýge ketip, sodan úıine oralmaǵan.
Al qalalyq ІІD balalardyń úıden qashý oqıǵalarynyń jıilep ketkenin aıtyp dabyl qaǵýda.
«Ata-analar bala tárbıesinde aǵat ketip jatady. Jaqsy tárbıe alǵan bala ata-anasyn ýaıymǵa salmaıdy. Qurmetti ata-analar, balalaryńyzǵa muqııat bolyńyzdar. Áıtpese arty qaıǵyly jaǵdaıda ákelýi múmkin», - dedi Almaty qalalyq ishki ister departamentiniń resmı ókili Saltanat Ázirbek.
