Dárigerge til tıgizgen Almaty turǵyny qamaýǵa alyndy
ALMATY. QazAqparat - Almatyda №7 klınıkalyq aýrýhanada kúzetshini soqqyǵa jyǵyp, dárigerdi balaǵattaǵan 36 jastaǵy turǵyn qamaýǵa alyndy, dep habarlaıdy QazAqparat tilshisi.
Oqys oqıǵa 8 mamyr kúni №7 qalalyq klınıkalyq aýrýhanada boldy. Almaty turǵyny kúzetshiniń murnyn syndyryp, qabyldaý bóliminiń hırýrg dárigerine til tıgizdi.
№7 qalalyq klınıkalyq aýrýhananyń baspasóz qyzmeti málim etkendeı, er adam aýrýhanaǵa túsken áıeline erekshe qaraýlaryn talap etti.
Qoǵamdyq orynda jáne qyzmettik mindetterin atqarý kezinde ar-namys pen abyroıyn qorlaǵany úshin dáriger polıtsııaǵa shaǵym túsirdi.
Sot otyrysynd er adam kinásin moıyndap, quqyq buzýshylyq faktisin rastady. Ol istegen isine ókinip, sottan qatań jazalamaýdy surady.
Almaty qalalyq mamandandyrylǵan aýdanaralyq ákimshilik soty QR ÁQBtK-niń 434-babynyń 1-bóliginde kózdelgen ákimshilik quqyq buzýshylyq jasaǵany úshin kináli dep taný týraly sheshim qabyldady. Sot ony 5 táýlikke ákimshilik qamaýǵa alý týraly qaýly shyǵardy.
