Dárigerdiń qateliginen elordalyq kelinshek bir omyraýynan aıyryldy
ASTANA. QazAqparat - Elorda soty klınıkada qatelesip oń jaq omyraýyn alyp tastaǵan áıeldiń paıdasyna shyǵyn óndirý týraly sheshim shyǵardy. Bul jaıynda Astana qalalyq sotynyń baspasóz qyzmetinen málim etti, dep habarlaıdy QazAqparat.
Azamatsha E. astanalyq klınıkalardyń birinde mammolog dárigerdiń tekserýinen ótken. Buǵan qosa, durys dıagnoz qoımaǵan dárigerdiń kásibıliginiń tómendiginen áıeldiń oń jaq sút bezi alynyp tastalǵan. Alaıda, qaterlik isik dıagonzy qoıylǵan oń jaq sút bezindegi isik qatersiz bolyp shyqqan.
«Astana qalalyq soty Esil aýdandyq sotynyń sheshimimen klınıkadan materıaldyq shyǵyn men moraldyq zalal óndirip alyndy. Sonymen qatar Astana qalalyq azamattyq ister jónindegi sot alqasy moraldyq zalal kólemin ulǵaıtty. Sheshim zańdy kúshine endi», - delingen taratylǵan aqparatta.
