Dárigerdiń eńbegin durys baǵalamaı densaýlyq saqtaý sapasy týraly aıtýǵa bolmaıdy - S. Asfandııarov atyndaǵy QazUMÝ oqytýshysy
ALMATY. Sáýirdiń 1-i. QazAqparat /Erlik Erjanuly/ - Qazaqtyń medıtsınalyq joǵary oqý oryndarynyń áli kúnge deıin jeke klınıkasy joq.
Bul Almatyda ótken Túrkııanyń emdik týrızmin tanystyrý uıymy uıymdastyrǵan 2 kúndik kórme-konferentsııada aıtyldy, dep habarlaıdy QazAqparat.
«Qazaqstanda emdik týrızm endi ǵana bastalyp jatyr. Óz densaýlyǵyn baǵalaǵan adamdar qaıda bolsa barady. Tipti aqshasy barlar óz múmkindigine qaraı shetelde bosanyp, emdelýde. Óıtkeni dárigerdiń eńbegin qoǵam da, úkimet te baǵalamaıdy. Eńbekaqy tómen bolsa, onyń sapasy qalaı joǵary bolady. Shymkenttegi JQTQ juqtyrý oqıǵasy sonyń dáleli», deıdi Qazaqtyń Sanjar Asfandııarov atyndaǵy ulttyq medıtsına ýnıversıtetiniń dotsenti Belgibaı Shahmetov. Ǵalymnyń aıtýynsha, bul kórme-konferentsııaǵa Túrkııadaǵy medıtsınalyq oqý oryndary ózderiniń klıkalaryn alyp kelip otyr. Ozyq qural-jabdyqtarmen jabdyqtalǵan emdeý oryndarynyń múmkindigi óte zor. Ókinishke oraı, munda klınıka Qazaqstandaǵy eń joǵarǵy medıtsınalyq oqý orny sanalatyn QazUMÝ-da joq. Eger osyndaı klınıkalar oqý ornynyń ózinde bolsa, mamandar oqyp júrip-aq tájirıbe jınap halyqty emdeý isine úlken yqpal jasar edi.
«Densaýlyq salasyna damyǵan elder jalpy ishki ónimniń 10-12 paıyzyn jumsaıdy. Bizde ol 2,5 paıyz ǵana. Básekelestikke qabiletti damyǵan el bolý úshin aldymen densaýlyq saqtaý salasyna kóńil bólý qajet. «100 aýrýhana» sııaqty baǵdarlamalar keshendi túrde júzege asyrylǵan kezde nátıjesi óte joǵary bolady», deıdi ǵalym.
