Dárigerdi zorlaǵan taksıstiń isi: Pavlodarlyq polıtseılerdiń ústinen tergeý bastaldy
PAVLODAR. QazAqparat – Pavlodar oblystyq Polıtsııa departamentiniń basshysy Amantaı Áýbákirov taksı júrgizýshisiniń dáriger qyzdy zorlaý isin tegeýdi jeke baqylaýyna alyp, mindetine salǵyrt qaraǵan polıtseıler jaýapkershilikke tartylatynyn aıtty, dep habarlaıdy QazAqparat.
Ravlodarnews.kz saıtynyń jazýynsha, Pavlodarda qyzdy zorlaý jáne tonaý faktisi týraly aqparat buǵan deıin Facebook-tegi #Nemolchıkz tobynyń paraqshasynda paıda boldy. Jarııalanymnyń avtory 2019 jylǵy 1 maýsymnan 2 maýsymǵa qaraǵan túni ápkesi men aǵasy keshke InDriver arqyly taksı shaqyrǵanyn jazǵan.
Bul rette, júrgizýshi qyzdyń aǵasyn birinshi jetkizip tastap, emhanada dáriger bolyp jumys isteıtin ózin odan ári ákele jatqan. Biraq úıine jeter-jetpes jerde kóliktiń esikterin buǵattap, qyzdy zorlaǵan. Buǵan qosa, quny 280 myń teńge turatyn «Aıfon-8» telefonyn alyp qoıyp, ózin mashınadan shyǵaryp jibergen.
Jábirlenýshi polıtsııaǵa júgingennen keıin kúdiktiniń týystary onyń izine túsip, 100 myń teńge usynǵan jáne aryzyn qaıtyp alýdy suraǵan.
Іstiń tergelýine qatysty Pavlodar oblystyq Polıtsııa departamentiniń basshysy Amantaı Áýbákirov túsinik berdi. 1 qazan kúni dáriger qyz ben onyń qorǵaýshysy bas polıtseıdiń jeke qabyldaýynda bolǵan.
«Іs boıynsha qosymsha birqatar sot saraptamalary taǵaıyndaldy. Nátıjeleri jaqyn arada daıyn bolady. Kúdikti M.-niń dálelderi tekseriledi jáne onyń qatysýymen tergeý áreketteri júrgiziledi. Onyń jeke basy men jasalǵan árekettiń aýyrlyǵyn eskere otyryp, qamaýda ustaýǵa baılanysty emes bultartpaý sharasy taǵaıyndaldy. Sonymen qatar, kúdikti M.-niń jábirlenýshige kelip, aryz alýdy suraǵan jaqyn týystary anyqtaldy. Qazirgi tańda olardyń qatysýymen tergeý áreketteri júrgizilip, zańdyq baǵa beriletin bolady», - dedi Amantaı Áýbákirov.
Budan bólek, qyzmettik mindetterine salǵyrt qaraǵan polıtseılerdiń ústinen qyzmettik tergeý bastalǵan.
«Atalmysh is boıynsha tergeýdiń tómen sapasy jáne sózbuıdaǵa salýǵa jol berilgeni úshin Ózindik qaýipsizdik basqarmasy oblystyq PD qyzmetkerlerine qatysty qyzmettik tergeýdi bastady. Onyń nátıjeleri boıynsha sharalar qabyldanatyn bolady. 1 qazan kúni azamatsha S. qorǵaýshysymen birge oblystyq PD bastyǵynyń jeke qabyldaýynda boldy jáne tergeý barysy erekshe baqylaýǵa alyndy. Qazaqstan Respýblıkasy QPK 201-babyna sáıkes ózge aqparat tergeý múddesine saı taratylmaıdy», - dedi PD basshysy.
