Dáriger vaktsınanyń ne sebepti júktiliktiń 16-shy aptasynan keıin salynatynyn túsindirdi

ÓSKEMEN. QazAqparat – Shyǵys Qazaqstan oblysy Altaı aýdandyq emhanasynyń akýsherlik jáne gınekologııa bóliminiń meńgerýshisi A.Karmenova Pfizer vaktsınasynyń ne sebepti júktiliktiń 16-shy aptasynan keıin salynatynyn túsindirip berdi, dep habarlaıdy QazAqparat tilshisi.

«Qazir elimizde júkti jáne jańa bosanǵan áıelder arasynda koronavırýs juqtyrǵandar azaımaı tur. Osy sanattaǵylar táýekel tobyna jatady. Júkti áıeldiń jatyryndaǵy uryq qorektik zattardy ózine alady. Olar – aqýyzdar, kómirsýlar, maılar, vıtamınder, mıkroelementter. Bul qorektik zattar áıel organızmindegi ımmýndy júıege tikeleı jaýap beredi», - dedi A.Karmenova.

Onyń aıtýynsha, Altaı aýdanynda amerıkalyq Pfizer ekpesiniń dozalary jetkilikti.

«Bul ekpede koronavırýstyń modıfıkatsııalanǵan rıbonýkleın qyshqyly bar. Ol áıel men náresteniń organızmine eshqandaı zııan keltirmeıdi. Uryqtyń organdary men júıesiniń qalyptasýy júktiliktiń 12-shi aptasynda aıaqtalady. Al náreste platsentasynyń qalyptasýy 16 aptaǵa deıin sozylady. Ekpeni júktiliktiń 16-shy aptasynan keıin, al jańa bosanǵandarǵa 42 kúnnen keıin alýǵa bolady», - dedi aýdandyq emhananyń akýsherlik jáne gınekologııa bóliminiń meńgerýshisi.