Dáriger tapshylyǵy, obyr boıynsha aldyńǵy úshtikte: ShQO medıtsınasyndaǵy máseleler qandaı

ÓSKEMEN. QazAqparat - Májilis depýtattary Shyǵys Qazaqstan oblysynyń dárigerlerimen densaýlyq saqtaý salasyn damytý máselelerin talqylady, dep habarlaıdy QazAqparat.

Májilis depýtattary, «Nur Otan» partııasy Fraktsııasynyń músheleri Erlan Saırov, Zarına Kamasova jáne Igor Panchenko Shyǵys Qazaqstan oblysynyń Óskemen qalasyndaǵy kópsalaly onkologııa jáne hırýrgııa ortalyǵynyń ujymymen kezdesti.

Jumys sapary barysynda olar onkologııalyq ortalyqtyń jumysymen tanysyp, mamandarmen kezdesip, pikir almasty.

Bıyl kópsalaly onkologııa jáne hırýrgııa ortalyǵyna «Nur Otan» partııasynyń saılaýaldy baǵdarlamasyn oryndaý maqsatynda kúrdeli jóndeý júrgizilip, zamanaýı syrtqy sáýlelik terapııa men radıohırýrgııalyq emdeýdiń barlyq túrlerin oryndaıtyn syzyqtyq údetkish qurylǵysy ornatylǵan bolatyn.

Ortalyqta zamanaýı jabdyqtarmen jaraqtandyrýǵa ǵana emes, sondaı-aq mamandardy daıarlaý men olardyń biliktiligin arttyrýǵa da zor kóńil bólinedi.

Atap aıtqanda, 26 dáriger Ulybrıtanııa, Frantsııa, Italııa, Izraıl, Túrkııanyń onkologııa klınıkalarynda taǵylymdamadan ótse, osy jyly sheteldik klınıkalarda taǵy 8 mamandy oqytý josparlanyp otyr.

Onkolog dárigerler konsýltatıvtik jáne ádistemelik kómek kórsetý úshin birqatar is-sharalar uıymdastyrýda.

Jalpy, 2021 jylǵy 1 shildedegi jaǵdaı boıynsha Shyǵys Qazaqstan oblysynda onkologııalyq aýrýlarmen aýyratyn 20 myńnan astam turǵyn esepte tur.

2020 jylmen salystyrǵanda aýrýlardyń sany 21,8% artqan.

- Oblys qaterli isikke shaldyqqan naýqastar sany jaǵynan elimizde aldyńǵy úshtikke enedi. Ásirese, sońǵy úsh jylda Óskemen qalasyndaǵy turǵyndar kóp shaldyqqan. Zaman talabyna saı qurylǵylarmen jabdyqtalǵan Onkologııa jáne hırýrgııa ortalyǵy óńirdegi osy máseleniń azaıýyna yqpal etýi tıis,- dedi Zarına Kamasova.

Sonymen qatar kezdesý barysynda dárigerler halyq qalaýlylaryna «Dáriger mártebesi» týraly zań qabyldansa jáne jas dárigerlerlerdi baspanamen qamtamasyz etý máselesi sheshilse eken degen usynystaryn jetkizdi.

Májilis depýtattary oblys aýdandaryndaǵy medıtsınalyq mekemelerge baryp, aýyldyq densaýlyq saqtaýdy damytý máselelerine erekshe nazar aýdardy.

Basty problemanyń biri – kadr tapshylyǵy. Mysaly, Altaı aýdanynyń aýdanaralyq aýrýhanasynda 30-ǵa jýyq maman jetispeıdi.

Jas mamandar aýdanda qalýy úshin salynyp jatqan 60 páterli úıde 20 páterdi medıtsına qyzmetkerlerine berýdi josparlap otyr.

Al, Shemonaıha aýdanynyń Rýlıha aýylyna «Nur Oran» partııasynyń saılaýaldy baǵdarlamasyn iske asyrý sheńberinde jóndeýden ótken otbasylyq-dárigerlik ambýlatorııaǵa medıtsına qyzmetkerleri kórshi aýrýhanalardan kelýge týra keledi.

Sebebi, onda jumys isteıtin turaqty qyzmetkerler joq.

Jergilikti bılik ókilderi aýyldyq jerdegi densaýlyq saqtaýdy damytýǵa daıyn bolashaq mamandar úshin turǵyn úı máselesin sheshýge ýáde berdi.