Dáriger tapshylyǵy: 31 myń maman jumystan shyǵyp, 1200 dáriger shetelge ketken
«Medıtsına mamandary tapshylyǵynyń negizgi sebebi – qyzmetkerlerdiń bir orynda turaqtamaýy bolyp otyr. Óıtkeni, eńbekaqy tóleý júıesi tolyq jetilmegen, medıtsına qyzmetkerlerin yntalandyrý, quqyqtyq qorǵaý men áleýmettik qoldaý da óte tómen. Bıylǵy 10 qazanda júrgizilgen zertteýge sáıkes, bir jylda 31 129 medqyzmetker (dárigerler men ortasha medıtsınalyq qyzmetkerler) jumystan shyqqan. Bul kórsetkish byltyrǵydan 9,3% tómen», - dedi Q. Tósekbaev Ortalyq kommýnıkatsııalar ortalyǵynda ótken onlaın brıfıngte.
Jumystan shyǵýdyń negizgi sebepteri retinde qyzmetkerdiń ótinishi, taraptardyń kelisimi, shtattyń qysqarýy jáne basqa da jaıttar kórsetilgen. Basqa jaıttar arasynda mamannyń qaıtys bolýy, aýrýǵa ushyraýy, múgedektik jáne zeınet jasyna shyǵý sebepteri bar.
«Syrtqy mıgratsııa boıynsha Shyǵys Qazaqstan, Soltústik Qazaqstan jáne Qaraǵandy oblystary kósh bastap tur. 2019 jyly medıtsınalyq bilimi bar 1212 maman Qazaqstan aýmaǵynan kóship ketken. Olardyń kóshýiniń basty sebepteri – tıimdi yntalandyrý tásilderiniń bolmaýy, psıhoemotsııalyq júkteme, kásibı damý múmkindikteriniń bolmaýy, quqyqtarynyń tómen dárejede qorǵalýy jáne áleýmettik kepildikterdiń bolmaýy.
Sonymen birge, medıtsınalyq bilimi bar mamandardyń ishki mıgratsııasyna 11278 adam qatysqan. Ásirese, Túrkistan oblysy men Nur-Sultan, Almaty qalalaryna medıtsınalyq mamandar kóptep aýysqan.
Aıta keteıik, Qazaqstanda 4122 shtattyq orynǵa dárigerler qajet. Ásirese, anestezıolog-reanımatolog, terapevt, jalpy praktıkalyq dáriger, zerthanashy dáriger, akýsher-gınekolog, ınfektsııalyq dárigerler jetispeı jatyr. Orta medıtsınalyq qyzmetkerler arasynda 8583 bos shtattyq oryn bar.