Dáriger orazany toqtatý týraly keńes berse, qulaq asqan jón - Janna Pralıeva

NUR-SULTAN. QazAqparat – Nur-Sultan qalasynyń bas memlekettik sanıtar dárigeriniń orynbasary Janna Pralıeva astanalyqtarǵa oraza ustaý kezinde densaýlyqty qalaı kútý kerektigin aıtty, dep habarlaıdy QazAqparat tilshisi.

«Bıyl musylmandar úshin koronavırýstyq indet kezinde táýekel etip, álsizdik tanytpaı orazany durys ustaý tolǵandyratyn másele aınaldy. Jasyratyny joq, Islamdaǵy 30 kúndik oraza – aǵza úshin qıyn mindet. Ol sátsiz ýaqytta adamdardyń belgili bir sanattarynyń ımmýndyq júıesin álsiretýi múmkin. Qaýip-qaterge dýshar bolǵan adamdar, atap aıtqanda, jaqynda koronavırýspen syrqattanǵan, sozylmaly aýrýlary bar jáne qalqansha beziniń problemasyna tap bolǵan jandar kóbinese Ramazan aıynda saý adamdarmen birge oraza ustaǵysy keledi. Osyndaı jaǵdaıda bolǵan adamdarǵa óziniń oraza ustaý múmkindigin 30 kúndik oraza ortalyǵynda talqylaý qajet», - dedi sanıtar dáriger.

Maman orazany úzýge negiz bolatyn syrqat belgilerin de atady.

«Eger siz saý bolsańyz jáne buryn da oraza ustaǵan bolsańyz, onda sizge esh kedergi joq. Alaıda, aýrýdyń alǵashqy belgileri, bezgek, álsizdik, ıis sezbeý jáne basqa da belgiler paıda bolǵan jaǵdaıda medıtsınalyq kómekke júginip, dáriger orazańyzdy toqtatý týraly keńes berse, oǵan qulaq asqan jón. Eń bastysy, alańdamańyz. Óıtkeni kúızelistiń ózi ımmýnıtettiń tómendeýine yqpal etedi. Durys tamaqtanyp, múmkindiginshe qoǵamdyq oryndarǵa barmaý kerek. Al mundaı oryndarǵa barǵan jaǵdaıda medıtsınalyq maska kıip, áleýmettik qashyqtyqty saqtaý qajet», - dedi Janna Pralıeva.

Sondaı-aq ol elordada koronavırýs juqtyrǵandar bir aptada 12 paıyzǵa óskenin aıtty.