Dáriger ókpeniń sozylmaly obstrýktıvti aýrýyn qalaı emdeýge bolatynyn aıtty

ALMATY. QazAqparat - Ókpeniń sozylmaly obstrýktıvti aýrýynyń aldyn alý barysynda pnevmokokk ınfektsııasyna qarsy vaktsınatsııa júrgizý mańyzdy. Bul týraly Kardıologııa jáne ishki aýrýlar ǴZI professory, medıtsına ǵylymdarynyń doktory Saýle Hasenova aıtty, dep habarlaıdy QazAqparat tilshisi.

Dárigerdiń sózinshe, ókpeniń sozylmaly obstrýktıvti aýrýynyń - negizgi belgileri – entigý, tańerteńgi jótel jáne aq nemese sary tústi qaqyryqtyń shyǵýy. Ol 40 jastan asqan aǵzasy osy aýrýǵa beıim adamdarda paıda bolady. «ÓSOA kezinde eń kishkentaı bronhtar (bronhıolalar) jáne alveolıarly qalqalar zaqymdalady, bul ókpeniń qurylymdyq zaqymdalýyna, tynys alý men gaz almasýdyń buzylýyna ákelip soǵady. Protsesti toqtatý múmkin emes, biraq ony baıaýlatýǵa bolady. Tynys alý fýnktsııasyn jaqsartý úshin ıngalıatorlar nemese suıyq eritindilermen nebýlaızerlik terapııa túrinde bronhty keńeıtetin preparattar taǵaıyndalady. Naýqastar dárigerdiń baqylaýymen uzaq ýaqyt emdeledi. Bronholıtıkalyq terapııany úıde jeke nebýlaızer apparatynda júrgizýge bolady»- deıdi Saýle Hasenova. Aıtýynsha, eger ÓSOA-men aýyratyn naýqasta jylyna 2-den astam aýrýdyń asqynýy baıqalsa, naýqastyń qabyldaıtyn bazıstik terapııasyn qaıta qarap, aýrýhanaǵa jatqyzý qajet. «Ókpeniń sozylmaly obstrýktıvti aýrýyna shaldyqqan naýqastar asqyný jaǵdaılaryna baıyppen qarap, ýaqtyly medıtsınalyq kómekke júginýi kerek. Pýlmonologqa júginý arqyly durys em alýyna jáne aýrýdyń asqynýyna jol bermeıdi»,- deıdi ol. Professor ÓSOA profılaktıkasy qaýip faktorlarynyń áserin azaıtýǵa baǵyttalǵanyn atap ótti. Temeki shegýden sanaly túrde bas tartý ókpe men bronh fýnktsııasynyń qalypty qurylymyn saqtap qalýǵa kómektesedi. «Naýqastarǵa vaktsınoprofılaktıka jasaý qajet. ÓSOA bar patsıentterge pnevmokokk ınfektsııasynan jáne tumaýdan jyl saıyn vaktsına jasaý usynylady. Vaktsına jasaý kezinde pnevmonııanyń damý qaýpi, ÓSOA asqynýy, emdelýge jatqyzý jáne ólim jaǵdaıy azaıady. Mamandandyrylǵan medıtsına ortalyqtarynda da, sonymen qatar óz betinshe úıde jasalatyn ókpe reanımatsııasynyń múmkindikteri týraly da esten shyǵarmaý kerek. Oǵan bronh tarmaǵynyń drenajdy qyzmetin jaqsartýǵa baǵyttalǵan durys tańdalǵan tynys alý gımnastıkasy, tynys alý bulshyqetteriniń emdik massajy, emdeýdiń fızıoterapevtik ádisteri, saıabaq aımaqtarynda serýendeý, oksıgenoterapııa jáne tynys alý aǵzalaryn qalpyna keltirýdiń basqa túrleri kiredi»- deıdi Saýle Hasenova

Foto: dreamstime.com