Dáriger Náılá Álmenova: Semeıdegi hospıs bazasynda 70 oryndyq statsıonar ashylady
SEMEI. QazAqparat – Búginde Semeı qalasynda koronavırýsqa shaldyqqandar azaımaı tur. Osy oraıda naýqastar sanynyń artýyna baılanysty shahardaǵy hospıs bazasynda qosymsha 70 tósek-oryn ázirlengen. Bul jaıly QazAqparat tilshisine №3 emhananyń bas dárigeri Náılá Álmenova aıtyp berdi.
«Semeıde áli kúnge deıin dert juqtyrǵandar anyqtalyp jatyr. Sońǵy málimet boıynsha, SOVID-19 ınfektsııasyna shaldyqqandar sany maýsym aıynda 2,8 ese ósip ketken. Buǵan birshama karantın shekteýleriniń alynýy, turǵyndardyń otbasylyq sharalardy ótkizýi - birden bir sebep. Dárigerler kúndiz-túni damyl kórmeı jumys isteýdemiz. Naýqastar sany kóbeıe bastaǵandyqtan ShQO Densaýlyq saqtaý basqarmasy qosymsha statsıonar ashý jaıly sheshim qabyldady. Sonyń biri - Semeıdegi hospıs bazasyndaǵy 70 tósek-oryn bolyp otyr», - deıdi Náılá Álmenova.
Onyń sózinshe, qazirgi ýaqytta dárigerler BAQ ókilderi men áleýmettik jeliler arqyly halyqqa barynsha túsindirý jumystaryn júrgizýde.
Sondaı-aq Semeıde turǵyndardy maska kııýge shaqyratyn chellendj bastalǵan.
«Osynyń nátıjesine jurt arasynda maska kıip, jeke bas gıgıena sharalaryn ustanatyndar kóbeıip keledi. Eger árqaısymyz ózimizdiń, otbasymyzdyń densaýlyǵy úshin alańdasaq, saqtyq sharalaryn qaperde ustaıyq. Maskadan bólek qolǵap kıip, qaıda júrsek te áleýmettik qashyqtyqty buzbaǵan jón. Bul indetti birlese áreket etsek qana jeńe alamyz», - deıdi dáriger.
