Dáriger mamandyǵynyń bedeli artyp keledi – Úkimet basshysy

ASTANA. QazAqparat – QR Premer-Mınıstri Álıhan Smaıylovtyń paıymynsha, elimizde dáriger mamandyǵynyń bedeli artyp keledi. Ol bul sózine dárigerlerdiń aılyǵy qalaı ósip jatqanyn mysal etip keltirdi, dep habarlaıdy QazAqparat tilshisi.

«Bizdiń mindetimiz – árbir azamatty sapaly ári qoljetimdi medıtsınalyq kómekpen qamtamasyz etý. Bul úshin densaýlyq saqtaý obektilerin salýǵa, medıtsınalyq tehnıka satyp alýǵa, zamanaýı tehnologııalardy engizýge, kadrlardy oqytýǵa qomaqty qarajat jumsalýda.

Qazirgi tańda magnıttik-rezonanstyq tomografııa, kompıýterlik tomografııa sııaqty qymbat medıtsınalyq zertteýler qoljetimdi boldy.

Byltyr naýqastardy radıohırýrgııalyq emdeýge arnalǵan Ortalyq Azııa elderindegi tuńǵysh Gamma-pyshaq ortalyǵy ashyldy.

Medıtsına qyzmetkerleriniń jalaqysy aıtarlyqtaı ósti. Bıyl olardyń ortasha jalaqysy 420 myń teńgeni, orta medıtsınalyq qyzmetkerlerdiń jalaqysy 234 myń teńgeni qurady. Dáriger mamandyǵynyń abyroı-bedeli arta túsýde»,- dedi Álıhan Smaıylov Úkimet otyrysynda.

Sondaı-aq, ol «Aýylda densaýlyq saqtaýdy jańǵyrtý» pılottyq jobasy ázirlenip jatqanyn eske saldy.

«2025-shi jylǵa qaraı aýyldyq eldi-mekenderde 650 alǵashqy medıtsınalyq-sanıtarlyq kómek obektisin salý kózdelip otyr. Sondaı-aq, 32 aýdandyq aýrýhana jańǵyrtylatyn bolady.

Jalpy, júrgizilip jatqan júıeli sharalar densaýlyq saqtaýdyń sapasyn jaqsartýǵa jáne qoljetimdi bolýyna baǵyttalǵan», - dedi Premer-Mınıstr.

Foto: primeminister.kz