Dáriger koronavırýstan keıingi asqynýlardyń aldyn alý joldaryn aıtty

ALMATY. QazAqparat - Almaty qalalyq 36 emhananyń jalpy praktıka dárigeri Raýan Nurkenov koronavırýstan keıingi asqynýlardy boldyrmaý jolyn aıtyp berdi, dep habarlaıdy QazAqparat tilshisi.

Dárigerdiń aıtýynsha, kóp jaǵdaıda adamdarda koronavırýs jeńil ótedi jáne aǵzasynda vırýstyń bar ekenin bilmeýi de múmkin.

«Qazir dárigerler PTR-testileý nátıjelerine súıenedi. Eger PTR-test oń nátıje kórsetse, patsıent dereý ózin-ózi oqshaýlaýǵa jiberiledi. Onymen baılanysta bolǵan adamdarmen jumystar júrgiziledi», - dedi ol.

Dáriger ár adamnyń jeke ımmýndyq júıesi bar ekenin jáne koronavırýs ár adamda ártúrli ótetinin atap ótti.

«Koronavırýs ınfektsııasynyń jeńil túrinen saýyqqan soń, trıgger aýrýynyń sıpatyn kórsetetin jaǵdaılar kezdesedi. Bul buryn koronavırýspen aýyrǵan kezde bolmaǵan sozylmaly aýrýlardyń órshýine ákep soǵady», - dedi medıtsına mamany.

Sonymen qatar, dáriger oqshaýlanýdy durys saqtaǵan jáne durys emdelgen jaǵdaıda syrqat asqynýsyz ótetinin atap ótti.

«Koronavırýspen aýyrǵannan keıin úsh aı ótken soń, memleket tarapynan ońaltý qarastyrylǵan. Bul postkovıdtik kezeńde jaqsy qalypqa kelýge yqpal etedi. Ońaltý josparyna fızıo-emdeý, tuzdy shahtalar, júzý jáne sanatorlyq-kýrorttyq kórsetkishter kiredi», - dep túıindedi dáriger.