Dáriger koronavırýs ınfektsııasy kezinde qashyqtan keńes alý týraly aıtty
NUR-SULTAN. QazAqparat - ZOOM platformasynda ótken onlaın dáris barysynda №10 qalalyq emhananyń jalpy praktıka dárigeri Danııar Qadyrov koronavırýs indeti kezinde qashyqtan keńes alý, mindetti áleýmettik medıtsınalyq saqtandyrýdyń artyqshylyqtary týraly aıtty, dep habarlaıdy QazAqparat tilshisi.
«Mindetti áleýmettik medıtsınalyq saqtandyrý áli engizilmegen kezdiń ózinde emhanada qajetti mamandar bolmaǵan jaǵdaıda patsıentter ózge emhanaǵa aqyly túrde qaralatyn. Endi ondaı patsıentterdi MÁMS aıasynda basqa uıymdarǵa baǵyttaı alamyz. Jumys tájirıbeme súıenip aıtar bolsam, meniń salmaǵy 100 keliden asatyn patsıentim boldy. Bizde MÁMS arqyly ǵylymı-zertteý ınstıtýtymen kelisim boldy. Biraq olardyń apparaty bizdiń patsıentke jaramdy bolatyndaı etip jasalmaǵan eken. Sondyqtan biz Prezıdenttiń is basqarmasy medıtsınalyq ortalyǵymen bir rettik kelisim-shart jasastyq. Patsıent sol jerde kompıýterlik tomografııadan ótti», - deıdi Danııar Qadyrov.
Ol deni saý adam konsýltatıvti-dıagnostıkalyq kómekke qanshalyqty jıi júginýi kerektigi týraly toqtalyp ótti.
«Kóp jaǵdaıda lor-dárigerge áldebir shaǵymmen barady. Balalar 18 jasqa deıin lor-dárigerge, stomatologqa qaralyp turýy kerek. Qant dıabetimen aýyratyn patsıentter úsh aı saıyn bıohımııa tapsyryp, kóz dárigerine, endokrınologqa qaralady. Al deni saý adam skrınıngten ótedi, onyń ishine EKG, qannyń jalpy taldaý jáne taǵy da basqa taldaýlar kiredi», - deıdi dáriger.
Sondaı-aq, ol pandemııa kezinde qashyqtan keńes berý qalaı júzege asqany týraly aıtty.
«Bizde aıaǵy aýyr áıelder men balasy bir jasqa tolmaǵan áıelder otyratyn chat bar. Biz olardy ár kún saıyn baqylaýda ustadyq. Topta analar densaýlyǵyna qatysty qandaı shaǵymy bar ekenin jazady, al biz qandaı em-shara qoldaný kerek ekenin jazamyz. Al jaǵdaıdyń ýshyǵyp turǵanyn baıqasaq – balany úıine baryp qaraımyz da, em-shara jazamyz. PTR testti úı jaǵdaıynda tapsyrtqan jaǵdaılar da boldy», - deıdi ol.
