Dáriger qateligi úshin jaza jeńildetilýi múmkin - zań jobasy

ASTANA. QazAqparat – Kásibı mindetin tıisti deńgeıde atqarmaǵan densaýlyq saqtaý qyzmetkerlerine taǵaıyndalatyn jazany jeńildetý qarastyrylyp jatyr. Bul týraly Densaýlyq saqtaý mınıstri Ajar Ǵınııat málim etti, dep habarlaıdy QazAqparat tilshisi.

«Memleket basshysynyń tapsyrmasy boıynsha bizdiń mınıstrlik «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn ázirledi. Zań jobasynda medıtsınalyq jáne farmatsevtıkalyq qyzmetkerlerdiń kásibı mindetterin tıisinshe oryndamaǵany úshin qylmystyq quqyq buzýshylyqtardy izgilendirý jáne QR Qylmystyq kodeksiniń 317-babynyń sanktsııalyq sharalaryn tómendetý jónindegi normalar usynyldy», - dedi Ajar Ǵınııat Úkimet otyrysynda baıandama jasaı otyryp.

Sondaı-aq mınıstr atalǵan ózgeristi engizýdiń sebebin túsindirip ótti.

«Medıtsına qyzmetkerleriniń kásibı jaýapkershiligine qatysty usynylǵan model jáne olar mindetin tıisti atqarmaǵan jaǵdaıda jazany jeńildetý aldymen azamattardyń quqyǵyn qorǵaýǵa baǵyttalady. Medıtsınalyq qyzmetterdi alý kezinde densaýlyqqa keltirilgen zııandy óteý, sol sııaqty medıtsına qyzmetkerleriniń jeke jáne qarjylyq quqyǵyn qorǵaýdyń múmkindigi artady. Odan bólek, medıtsına salasynan bilikti mamandardyń ketýin azaıtýǵa baǵyttalyp otyr», - deıdi vedomstvo basshysy.