Dáriger qateligi: Qazaqstanda naýqasqa saqtandyrý tólemin berý engizilmek

ASTANA. QazAqparat – Dárigerdiń kinásinen adam densaýlyǵyna zııan kelgen jaǵdaıda ótemaqy tóleý eskerilgen. Densaýlyq saqtaý mınıstri Ajar Ǵınııat medıtsına qyzmetkerleri kásibı jaýapkershiliginiń saqtandyrý júıesin engizý aıasynda qarastyrylǵan tetikterge qatysty pikir bildirdi, dep habarlaıdy QazAqparat tilshisi.

«Bul baǵytta usynys qarastyryp, ony áli de pysyqtaımyz. Halyqaralyq tájirıbege toqtalsaq, birqatar elde saqtandyrý kompanııalary naýqas óz emine jumsaǵan qarajatyn, qandaı shyǵyn keltirilgenin anyqtaıdy», - dedi A. Ǵınııat Májiliste zań jobasyn tanystyrǵannan keıin tilshiler saýalyna jaýap bere otyryp.

Onyń aıtýynsha, bul máseleni saqtandyrý kompanııalary sheshetin bolady.

«Densaýlyq saqtaý salasynyń áleýmettik baǵdarlanýyn eskere otyryp, saqtandyrý júıesin engizýdiń bastapqy kezeńinde «Kólik quraldary ıeleriniń azamattyq-quqyqtyq jaýapkershiligin mindetti saqtandyrý týraly» Zańǵa uqsas saqtandyrý jaǵdaıy boıynsha saqtandyrýshy jaýapkershiliginiń shekti kólemin aıqyndaý usynyldy», - dedi mınıstr.

Osy oraıda medıtsına qyzmetkerleriniń kásibı jaýapkershiligin saqtandyrý júıesi kólik salasyndaǵy mindetti saqtandyrýǵa uqsas júrgiziledi. ıAǵnı, naýqastyń ómirine nemese densaýlyǵyna zııan kelse, tıisti tólem qarastyrylmaq:

- ólim - 1000 aılyq eseptik kórsetkish;

– birinshi toptaǵy múgedektik belgilengende – 800 AEK, ekinshi top – 600 AEK, úshinshi top - 500 AEK.

– mertigýge, jaraqattanýǵa alyp kelgen jaǵdaıda, ıaǵnı patsıenttiń ambýlatorııalyq nemese statsıonarlyq emdelýine shyǵyndary bolsa - 300 AEK.

Budan buryn habarlanǵandaı, medıtsına qyzmetkerleriniń kásibı jaýapkershiligi boıynsha mindetti saqtandyrý júıesi engiziledi.