Dáriger eminiń nátıjeli bolýy medbıkeniń múltiksiz qyzmetine baılanysty
ALMATY. QazAqparat – Búgin - Halyqaralyq medbıkeler kúni. Almatydaǵy Pedıatrııa jáne balalar hırýrgııasy ǵylymı ortalyǵynda 300-ge jýyq medbıke jumys isteıdi. Naýqas nárestelerdiń dertine daýa izdep, árbir emdelýshiniń jaǵdaıyn jasap, olardyń tez saýyǵyp ketýine úles qosyp júrgen medbıkelerdiń alar orny bólek.
Solardyń biri Neonatologııa jáne jańa týǵan náresteler hırýrgııasy bólimshesiniń medbıkesi Gúljan Sádibek. Ol atalǵan ortalyqta 33 jyldan beri jumys istep keledi.
«Men eńbek etetin neonatologııa bóliminiń jaýapkershiligi mol. Tipti medbıkelerdiń kóterer júgi eki ese aýyr desek te bolady. Óıtkeni bul jerge jańa týǵan náresteler ǵana túsedi. Bizdiń qaraıtyn balalardyń salmaǵy 650 gramm. Árıne olar erekshe kútimdi qajet etedi. Tipti tez salmaq qosyp, saýyǵyp ketýine medbıkelerdiń qosar úlesi zor»,– deıdi Gúljan Sádibek.
Onyń aıtýynsha, ınkýbatordaǵy (kıývez) náresteler medbıkeniń tikeleı qaraýynda bolady. Mundaı jaǵdaıda áriptesterim saqshy sııaqty táýlik boıy sábıdiń janynan shyqpaıdy. Olar kez kelgen sátte alǵashqy kómekke daıyn bolýy kerek.
«Shala týǵan jáne kúrdeli operatsııa jasalǵan shaqalaqtarǵa dári egýde de ońaı sharýa emes. Alsań alaqanyńa sııatyn kishkentaıdyń kók tamyryn taýyp, kateter qoıý da úlken eptilikti, tájirbıeni talap etedi. Zerigerlik jumyspen teń desek te bolady»,– deıdi medbıke.
Sonymen qatar, ol sábı tez saýyǵyp, ata-analarynyń qolyna berilse balasha qýanatyndaryn aıtty.
«Bala degen – úlken baqyt qoı. Kez-kelgen ata-ana sábıiniń deni saý bolǵanyn qalaıdy. Óz kásibińe adal bolyp, barynsha qoldaý kórsetseń, ony halyq aıtyp júredi. Shúkir eńbegimizge dán rıza ata-analar sany sheksiz»,– deıdi ol.
Dáriger eminiń nátıjeli bolýy medbıkeniń em-domdy ýaqtyly kórsetip, óz mindetin múltiksiz atqarýyna tikeleı baılanysty. Naýqastyń densaýlyǵyna dárigerden kem jaýap bermeıtin de solar.
«33 jyl az ýaqyt emes. Osy ýaqyt aralyǵynda meniń qolymnan 10 myńnnan astam sábı ótti. Qyzyǵy sol qazir olardyń aldy otbasyn quryp, ózderi de sábıli boldy. Bizdi umypaıdy. Áli kúnge deıin habarlasyp turady. Eńbektiń jemisi degen osy emes pe?»,– dep qortyndylady Gúljan Sádibek.
Eske sala ketsek, QR Densaýlyq saqtaý mınıstri Eljan Birtanov koronavırýs pandemııasymen kúreste aldyńǵa qatarda bolǵan medbıkelerge alǵys aıtyp, Halyqaralyq medbıkeler kúnimen quttyqtady.
