Dáriger: Basty mindetimiz kásibı ári jaýapkershilikpen jumys isteý
ORAL. QazAqparat – Qazirgideı koronavırýspen jappaı kúres júrgizilip jatqan kezeńde óz mindetimizdi kásibı ári jaýapkershilikpen atqara bilýimiz kerek. Bul týraly Báıterek aýdandyq aýrýhanasynyń dáriger-reanımatology Azamat Іzbasov málim etti, dep habarlaıdy QazAqparat tilshisi.
Onyń aıtýynsha, dáriger bolyp 2008 jyldan beri eńbek etip keledi.
«Qazirgi kezde provızorlyq bólimshede 29 naýryzdan beri jumys jasap jatyrmyn. Árıne, osyndaı ýaqytta medıtsına qyzmetkerlerine ústemeaqy tólenip jatqany – memleket tarapynan úlken qoldaý. Emdelýshilerge barynsha qyzmet kórsetýdemiz. Olardyń arasynda koronavırýspen shaldyqqan adamdarmen qarym-qatynasta bolǵandar nemese shet elden kelgender bar», deıdi Azamat Іzbasov.
Dáriger negizi naýryz aıynda eńbek demalysyna shyǵýy kerek eken. Biraq demalys tótenshe jaǵdaıǵa baılanysty keıinge qaldyryldy.
«Eń bastysy, indet qaterinen tezirek qutylyp, qalypty ómirge oralsaq eken. Buǵan óz úlesimizdi qosý – kásibı ári azamattyq boryshymyz», dedi QazAqparat tilshisine A.Іzbasov.
Eske sala keteıik, budan buryn BQO-da 215 medıtsına qyzmetkerine 22,6 mln teńge tólengenin, óńirde sońǵy tirkelgen eki naýqastyń biri Reseıden kelgenin jazǵan bolatynbyz.
