Dáriger aýrýhana qaqpasy aldynda qaıtys bolǵan naýqas áıeldiń jaǵdaıyn durys baǵalamaǵan - DSM
ASTANA. 24 shilde. QazAqparat - Almaty qalasyndaǵy Ortalyq qalalyq klınıkalyq aýrýhananyń qaqpasy aldynda turǵylyqty jeri belgisiz áıeldiń qaıtys bolý oqıǵasyna baılanysty
QR Densaýlyq saqtaý mınıstrliginiń Medıtsınalyq jáne farmatsevtıkalyq qyzmetti baqylaý komıteti táýelsiz medıtsınalyq sarapshylardy tarta otyryp, arnaýly komıssııa qurdy. Bul týraly QR Densaýlyq saqtaý mınıstrliginiń Medıtsınalyq jáne farmatsevtıkalyq qyzmetti baqylaý komıtetinen habarlandy.
«Tekserý qorytyndysy boıynsha marqumdy klınıkanyń qabyldaý bólimine jedel medıtsınalyq járdem brıgadasy 2013 jylǵy 14 shilde kúni keshke jetkizgeni anyqtaldy. Áıeldiń qoltyǵyndaǵy irińdegen jaradan qurt tabylǵan. Qabyldaý bóliminde kezekshi hırýrg naýqastyń sút bezi obyry dertin anyqtap, jarasyn óńdegen soń qalalyq onkologııalyq dıspanserge barýǵa keńes bergen. Qabyldaý bóliminiń kezekshi hırýrg-dárigeri Ortalyq klınıkalyq aýrýhananyń hırýrgııa bólimine jatqyzýǵa muqtaj naýqastyń jaǵdaıyn durys baǵalamaǵan», delingen baspasóz baıanynda.
Qazirgi ýaqytta sot-medıtsınalyq saraptama ortalyǵy ólim sebepterin anyqtaý ústinde. Komıssııanyń tekserý qorytyndylary quqyqtyq baǵa berý úshin Almaty qalasynyń prokýratýrasy men ishki ister departamentine joldandy.
