Dáriger: Almatyda Pfizer vaktsınasyn alýǵa nıet bildirýshiler kóp

ALMATY. QazAqparat- Almatyda Pfizer vaktsınasyn alýǵa nıet bildirýshiler kóp. Bul týraly №7 emhananyń bas dárigeriniń orynbasary Nurbol Jumabekov brıfıng barysynda aıtty, dep habarlaıdy QazAqparat tilshisi.

Spıkerdiń sózinshe, Almatyda kún saıyn 132 vaktsınatsııa pýnkti, onyń ishinde №7 qalalyq emhananyń ekpe salý bólmesi jumys isteıdi.

«Biz vaktsınalaýdyń jaqsy qarqynyna jettik. Jalpy, jasóspirimderdiń, júkti áıelder men bala emizetin analardyń belsendiligi qýantady. Naýqan bastalǵannan beri bizdiń emhanada 324 adam ekpe aldy, onyń ishinde 11 júkti áıel, 31 bala emizetin ana 282 jasóspirim bar. Biz «Komırnatı» Pfizer preparatynyń tıimdiligi 95%-dy quraıtynyn aıtyp otyrmyz», - dedi Nurbol Jumabekov.
Sonymen qatar, ol Almatynyń Bostandyq aýdanyna barlyǵy Pfizer óndirgen vaktsınanyń 2 016 dozasy bólingenin, qazirdiń ózinde 1 386 adam egilgenin aıtty.
«Árbir egý pýnktinde qaýipsizdiktiń qatań normalary, atap aıtqanda temperatýralyq rejım saqtalady. Vaktsına alǵan kezde birinshi kezekte patsıentti tekserý júzege asyrylady, onyń barysynda anamnez alynady. Sondaı-aq, dárigerler ótken aýrýlar týraly suraıdy.Temperatýrany, qysymdy ólsheý, jutqynshaqty tekserý tikeleı júrgiziledi. Sonymen qatar, dárigerler vaktsınalanǵan adamǵa nemese onyń ata-anasyna saýalnama júrgizedi. Al júkti áıelderdi vaktsınatsııalaý kezinde merzimderdi belgileý qajet»,- deıdi dáriger.
Spıker «Komırnatıdiń» bir qutysy 6 adamǵa eseptelgenin jáne alty saǵattan aspaý kerek ekenin eske saldy.
Nurbol Jumabekov vaktsınatsııaǵa tirkeý orny arqyly aldyn ala jazylýǵa keńes berdi.
№7 emhananyń bas dárigeriniń orynbasary vaktsınalaý naýqany bastalǵannan beri vaktsınalanǵandardyń arasynda 1-2 kún ishinde ınektsııa ornynda temperatýranyń shamaly kóterilýi men aýyrsynýdy qospaǵanda, eleýli janama áserler baıqalmaǵanyn aıtty.
«Inektsııa salynǵan jerge úsh kún boıy sý tıgizýge jáne fızıkalyq belsendilik tanytýǵa, vannaǵa túsýge bolmaıdy. Eger jaısyz seziný baıqalsa óz dárigerińizge nemese ekpe salǵan dárigerge habarlasqan jón»,- deıdi ol.