Darıǵa Nazarbaeva jol apatynda qaza tapqandardyń týystaryna kóńil aıtty
NUR-SULTAN. QazAqparat - Parlament Senatynyń tóraǵasy Darıǵa Nazarbaeva Jambyl oblysyndaǵy iri jol-kólik oqıǵasyna qatysty kóńil aıtty, dep habarlaıdy QazAqparat Senattyń baspasóz qyzmetine silteme jasap.
«Jambyl oblysyndaǵy 11 adamnyń qazasyna ákelip soqqan jol apatyna qatysty marqumdardyń jaqyndaryna kóńil aıtamyn. Kóz jumǵan jandardyń týystary men jaqyndarynyń qaıǵysyna ortaqpyn, al apattan zardap shekkenderdiń tezirek jazylyp ketýine tilektespin. Qazirgi kezde barlyq qajetti medıtsınalyq kómek kórsetilip jatyr, oqıǵanyń mán-jaıy anyqtalýda», - delingen habarlamada.
Eske sala keteıik, búgin «Almaty-Tashkent» avtojolynyń boıynda iri jol apaty bolyp, 11 adam qaza tapty. Taǵy 5 adam ota ústelinde, al 3 adam jansaqtaý bóliminde jatyr. Qazir oblysta jedel shtab qurylǵan. Psıhologtar kezekshiligi qosylǵan «qaýyrt jeli» +7 (7262) 513575 jáne +7 (7262) 514167 jumys istep tur. ІІM málimetinshe, apatqa ushyraǵandar arasynda Qazaqstan, Ózbekstan jáne Tájikstan azamattary bar.
