Darıǵa Nazarbaeva jeke úı qurylysyna jer bólý máselesine qatysty pikir bildirdi
NUR-SULTAN. QazAqparat - QR Parlament Senatynyń tóraǵasy Darıǵa Nazarbaeva jeke turǵyn úı qurylysyna jer telimderin bólýdi jedeldetýge shaqyrdy, dep habarlaıdy QazAqparat tilshisi.
«Eger de óńirler bólinisinde qaraıtyn bolsaq, onda jeke turǵyn úı qurylysy úshin jer ýchaskesine degen kezekte ondaǵan myń adam tur. Bul adamdar bıýdjetten aqsha surap turǵan joq, olar ýáde etilgen 10 sotyq jerdi bólip berýdi surap otyr jáne sol ýchaskege óz úılerin salýǵa daıyn. Árbir jańa úı ár óńirdiń qosymsha múligi bolyp sanalady, osy oraıda jer telimi salyǵy, múlik salyǵy, kommýnaldyq tólemder esepteledi. Bul óz kezeginde kez kelgen eldi mekenniń bıýdjettegi kiris bóligin tolyqtyrady», - dedi ol Parlament Senatynyń jalpy otyrysynda.
Senat spıkeriniń paıymynsha, baspana kezeginde turǵan adamdardyń basym bóliginiń máselesin jeke turǵyn úı qurylysy arqyly sheshýge bolady.
«Baspana máselesin túbegeıli sheshý kerek, sebebi bul problema jyl saıyn jalǵasyp keledi. Biz barlyq syltaýdy aldyn ala bilemiz, ıaǵnı «ınfraqurylymdyq damýǵa qarjy az bólinedi», «transfertten aqsha jetkiliksiz bólindi» degen ýáj aıtylady. Meniń oıymsha, bul jaǵdaıdy ońtaıly sheshýge bolady, osy turǵyda kóptegen qarjylyq tetikterdi pysyqtaý kerek», - dedi Darıǵa Nazarbaeva.
Budan buryn habarlanǵandaı, Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» Zańy qabyldandy.
Qujat kópbalaly otbasylardyń jáne jumys isteıtin jastardyń baspana máselesin jedel sheshý úshin zańnamalyq negizdi qalyptastyrady.
