Darıǵa Nazarbaeva: Jeke áskerı kompanııalar qurý týraly usynysty qoldamaımyn

ASTANA. QazAqparat - Qazaqstanda jeke áskerı kompanııalar joq. Biraq onyń qurylýyn qoldamaımyn. Bul týraly QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva málim etti, dep habarlaıdy QazAqparat.

Buǵan deıin, BAQ-ta  Ujymdyq qaýipsizdik týraly shart uıymy elderine jeke áskerı kompanııalardy zańdastyrý jóninde usynys jasalǵandyǵy habarlanǵan edi.

Senattyń jalpy otyrysynan keıin tilshiler tarapynan qoıylǵan atalǵan usynysqa qatysty suraqqa Darıǵa Nazarbaeva pikirin bildirdi.

«Qazaqstan aýmaǵynda osyndaı kompanııalar joq. Bul másele mundaı jeke áskerı kompanııalary bar elderge qatysty dep oılaımyn», - dedi ol.

Sonymen qatar D. Nazarbaeva atalǵan kompanııalar Qazaqstanǵa kerek emes degen oıyn qosty.

«Mundaı ıdeıany qoldamaımyn. Bular adam óltirýdiń jeke mashınasy ispettes, sondyqtan mundaı kompanııalar bolmaýy tıis»,- dep qadap aıtty depýtat.