Darıǵa Nazarbaeva Vatıkanǵa barýdy josparlap otyr

NUR-SULTAN. QazAqparat - Parlament Senatynyń Tóraǵasy, Álemdik jáne dástúrli dinder lıderleri Seziniń basshysy Darıǵa Nazarbaeva Qazaqstandaǵy Apostol Nýntsııi Frensıs Assızı Chýllıkatty qabyldady, dep habarlaıdy QazAqparat joǵary palatanyń baspasóz qyzmetine silteme jasap.

Vatıkan ókili beıbit únqatysý arqyly dinder men mádenıetter arasyndaǵy kelispeýshilikterdi eńsere otyryp, jahandyq qaýipsizdikti nyǵaıtýdaǵy Qazaqstannyń qyzmetin joǵary baǵalady. «Álemdik jáne dástúrli dinder lıderleri Sezi qazirgi zamandaǵy ózekti máseleler men qaýip-qaterlerdi sheshýde erekshe alań bolyp tabylady», - dep atap ótti ol.

Senat basshysy Qazaqstan men Vatıkan arasyndaǵy syndarly is-qımyl týraly aıta kelip, Qazaqstan Pontıfık barǵan Ortalyq Azııadaǵy alǵashqy jáne jalǵyz el bolǵanyn atap ótti. 2001 jyly Astanaǵa Papa II Ioann Paveldiń sapary elimiz úshin erekshe oqıǵalardyń biri boldy. D.Nazarbaeva Álemdik jáne dástúrli dinder lıderleriniń VII Sezine daıyndyq barysynda Vatıkanǵa barýdy josparlap otyrǵanyn aıtty.

Senat Tóraǵasy Vatıkandaǵy pedıatrııalyq klınıka qyzmetiniń tabysty tájirıbesin atap ótip, qazaqstandyq balalarǵa medıtsınalyq kómek kórsetý jáne dárigerlerdi ozyq tehnologııalarǵa oqytýdy qamtamasyz etý úshin Vatıkan men Qazaqstannyń Densaýlyq saqtaý mınıstrligi arasyndaǵy yntymaqtastyqty qalyptastyrýdy usyndy.

Qazaqstandaǵy Apostol Nýntsııi Vatıkannyń dinı qyzmetkerlerin vızamen qamtamasyz etý máselesin kóterdi. Olar jyl saıyn vızany uzartýǵa májbúr bolady ári ol yńǵaısyzdyq týdyryp keledi. Senat basshysy atalǵan máseleni baqylaýyna aldy. Syrtqy ister mınıstrliginde osy baǵyttaǵy jumystar bastalǵan bolatyn, endi, mekemearalyq resimderdi retteý qajet.

Kezdesý aıasynda Konfessııaaralyq jáne órkenıetaralyq damý jónindegi N.Nazarbaev Ortalyǵynyń BUU uıymdarymen yntymaqtastyǵynyń keleshegi talqylandy.