Darıǵa Nazarbaeva Valentına Matvıenkomen kezdesti

SANKT-PETERBÝRG. QazAqparat - Qazaqstan Respýblıkasy Parlamenti Senatynyń tóraǵasy Darıǵa Nazarbaeva RF Federaldyq Jınalysy Federatsııa keńesiniń tóraǵasy Valentına Matvıenkomen kezdesti, dep habarlaıdy «QazAqparat» HAA-nyń menshikti tilshisi.

Kezdesý barysynda Senat basshysy Qazaqstan men Reseı arasyndaǵy áriptestiktiń strategııalyq sıpatyn, sondaı-aq eki eldiń Eýrazııa keńistiginde ekonomıkalyq ıntegratsııany damytýdaǵy mańyzdy rólin atap ótti.

«TMD PAA Keńesi tóraǵasy retindegi belsendi qyzmetińizdi joǵary baǵalaımyz. Sizdiń arqańyzda TMD Parlamentaralyq Assambleıasy Eýrazııadaǵy ıntegratsııalyq protsesterdiń basty flagmandarynyń birine aınaldy. Assambleıanyń uıymdyq qurylymdary nyǵaıyp, halyqaralyq bedeli de únemi artyp keledi», - dedi D.Nazarbaeva.

Sondaı-aq joǵary palata tóraǵasy ekologııa problemalaryna da nazar aýdardy. Atap aıtqanda, sýdy paıdalaný jáne transshekaralyq ózender máselelerin, áskerı polıgondardyń aınalasyndaǵy ekologııalyq jaǵdaıdy anaǵurlym tıimdi retteý úshin birlesken jumysty uıymdastyrý qajettigine nazar aýdardy. D.Nazarbaeva ekologııa jóninde modeldi zań ázirleýdi usyndy.

V.Matvıenko Senat tóraǵasyn Reseı Federatsııasyna saparmen kelýge shaqyryp, Qazaqstanda ótetin kezekten tys Prezıdent saılaýyna TMD PAA jáne Federatsııa Keńesinen baqylaýshylardy jiberýge ázir ekendigin bildirdi. Federatsııa Keńesiniń tóraǵasy Qazaqstannyń Tuńǵysh Prezıdenti N. Nazarbaevqa izgi tilekterin aıtyp, Elbasynyń qazaq memlekettigin damytýǵa qosqan úlesin joǵary baǵalady, ıntegratsııalyq protsesterdi jyljytýdaǵy kóshbasshylyǵyn atap kórsetti.

Avtory Medet Ahmetov