Darıǵa Nazarbaeva Úkimet basshysynan ınternetke qatysty birneshe suraqqa jaýap berýdi surady
«2020 jyldyń nátıjeleri boıynsha memleket Qazaqstan Respýblıkasy halqynyń 98,7% ınternet jelisine keńjolaqty qoljetimdilikpen qamtamasyz etti. Bul sandardyń durystyǵyna sarapshylar da, halyq ta kúmán keltiredi. 510 aýyldyq eldi mekende Internettiń tómen jyldamdyǵy baıqalady. Sonymen qatar, Nur Otan partııasynyń «Ózgerister joly: Ár azamatqa laıyqty ómir!» saılaýaldy baǵdarlamasyn iske asyrý boıynsha Jol kartasynyń 36-tarmaǵy aıasynda qalalyq jáne aýyldyq mektepterdiń bilim sapasyndaǵy alshaqtyǵyn azaıtý úshin 2025 jylǵa qaraı 100% kórsetkishke qol jetkize otyryp, 2021 jyly aýyl mektepteriniń 80% joǵary jyldamdyqty ınternetpen qamtamasyz etý qajettiligi atap ótildi», - dep toqtaldy D. Nazarbaeva.
Ol ınternettiń tómen jyldamdyǵynyń sebebi retinde Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrligi aýyldyq eldi mekenderdi Internetpen qamtamasyz etý úshin qosymsha qosylýlardy paıdalaný qajettigin aıtty.
«Osyǵan baılanysty tıisti suraqtarǵa jaýap berýińizdi suraımyn. Aýyldyq eldi mekenderde ınternet jelisine qoljetimdilikti qamtamasyz etýdiń naqty tehnologııasyn qoldaný týraly sheshim qalaı qabyldanady jáne osy tehnologııalardyń aıyrmashylyǵy nede? Baılanys operatorlary aýyldyq eldi mekenderdegi «sońǵy mılıa» máselesin qalaı sheshedi jáne sheshimniń qandaı tásili neǵurlym tıimdi bolyp otyr? Qazirgi zamanǵy tehnologııalar engiziledi me jáne Tsıfrlyq damý, ınnovatsııalar jáne aeroǵarysh ónerkásibi mınıstrligi nemese Qazaqstan Respýblıkasynyń ózge de memlekettik organy «sońǵy mılıany» qosýdyń qandaı da bir túriniń maqsattylyǵyn aıqyndaýǵa qatysa ma? Aýyldyq eldi mekenderde ınternetke qosylý sapasyn turaqty negizde ólsheý júrgizile me jáne bul másele Qazaqstan Respýblıkasynyń qandaı memlekettik organynyń quzyretinde tur?», - dedi depýtat.
