Darıǵa Nazarbaeva: Turmystyq jáne ónerkásiptik qaldyqtardy qaıta óńdeý problemasyn sheshýde júıeli tásil qajet
NUR-SULTAN. QazAqparat - Senatta «Turmystyq jáne ónerkásiptik qaldyqtardy jınaý jáne óńdeý» taqyryby boıynsha úkimet saǵaty boldy, ony Agrarlyq máseleler, tabıǵatty paıdalaný jáne aýyldyq aýmaqtardy damytý jónindegi komıteti uıymdastyrdy, dep habarlaıdy Joǵarǵy Palatanyń baspasóz qyzmeti.
Elimizdiń ekologııa, geologııa jáne tabıǵı resýrstar mınıstri Maǵzum Myrzaǵalıev negizgi baıandama jasady. Ol Qazaqstannyń «jasyl» ekonomıkaǵa kóshýi jónindegi tujyrymdamasy aıasynda 2030 jylǵa qaraı eldegi qaldyqtardy óńdeý úlesi 40 paıyzǵa, 2050 jylǵa qaraı 50 paıyzǵa deıin jetýi tıis ekeni týraly senatorlardy habardar etti. Ol sondaı-aq elektr energııasyn alý maqsatynda qaldyqtardy órteýdi jáne odan ári jańartylatyn energııa kózderimen birdeı elektr jelilerine berýdi kózdeıtin «Waste to Energy» jobasyn júzege asyrý týraly aıtty. «Bul joba qaldyqtardy polıgondarda kómý kólemin bir ese qysqartýǵa ǵana emes, sondaı-aq osy baǵytqa ınvestıtsııa tartýǵa múmkindik beredi», - dedi mınıstr.
Senat Tóraǵasy Darıǵa Nazarbaeva sóz sózinde turmystyq jáne ónerkásip qaldyqtaryn jınaý, kádege jaratý jáne qaıta óńdeý problemasyn sheshýde júıeli tásil qajettigine nazar aýdardy.
Senat basshysy ekologııalyq problemalardy sheshý úshin qatty turmystyq qaldyqtardy qaıta óńdeý jáne kádege jaratý jónindegi memlekettik baǵdarlama ázirleý qajet dep esepteıdi. «Búginde mınıstrlik jańa ekologııalyq kodeks boıynsha jumystardy júzege asyrýda. Memlekettik baǵdarlamasyz, baǵyt-baǵdarsyz biz erteń Ekologııalyq kodeksti qalaı qabyldaıtynymyz maǵan belgisiz bolyp otyr. Bizde qazirdiń ózinde tujyrymdama bar, ol 2013 jylǵy deńgeıde qalǵan, alty jyl ótse de ári qaraı qozǵalys joq. Osynyń bárin Sizden qatań suraıtyn bolamyz, óıtkeni bul máselelerdi odan ári keıinge qaldyrýǵa bolmaıdy», - dedi Senat basshysy ekologııa mınıstrine.
Senat Tóraǵasy bul rette polıgondarda azyq-túlik jáne qurylys qaldyqtaryn kómýge tyıym salýǵa asyqpaý kerek, dep sanaıdy. Salalyq mınıstrliktiń derekteri boıynsha, mundaı tyıym 2020 jyldan bastap engiziledi. «Al ony qaıda jiberetinimizdi bilgimiz keledi. Úkimet nemese zańdar qandaı da bir balama bolýy úshin ne usyna alady? Bul másele ázirge tolyq pysyqtalmaǵan dep sanaımyn, sondyqtan oǵan tyıym salýǵa bolmaıdy. Óıtkeni, erteń adamdar jumys istep jatqan polıgondardy jazalaý bastalady. Bul mán-maǵynasyz másele bolady», - dedi Darıǵa Nazarbaeva.
D.Nazarbaeva Qazaqstan aýmaǵyndaǵy radıoaktıvti qaldyqtar máselelerine jeke toqtaldy. Ol zalaldy qaldyqtar azamattardyń densaýlyǵyna zııan keltirip jatqan kezde medıtsınalyq shyǵyndardyń mánisi joqtyǵyn atap ótti: «Turmystyq qaldyqtardan basqa, bizde 170 mıllıon tekshe metr radıoaktıvti qaldyqtar jınaqtalyp qalǵan. Ol jaı ǵana topyraq pen atmosferany lastap qana qoımaıdy, barshaǵa ólim qaýpin tóndiredi».
Salalyq komıtet tóraǵasy Álı Bektaev úkimet saǵaty barysynda elimizde qaldyqtardy basqarý jónindegi, onyń ishine ónerkásiptik jáne turmystyq qaldyqtar boıynsha monıtorıng, qaıta óńdeý jáne kádege jaratý enetin júıe joq ekenin atap ótti. Bul eldiń ornyqty damýyna kedergi keltiredi.
Sharaǵa qatysýshylar aldynda ónerkásip jáne óndiris qaldyqtarymen jumys isteý jónindegi qaýymdastyqtyń tóraǵasy Aleksandr Rıabının, Qaraǵandy qalasyndaǵy «Gorkomtrans» seriktestiginiń dırektory Vıktor Ivanov, Qostanaı oblysyndaǵy Lısakov qalasynyń qatty turmystyq qaldyqtar polıgondy paıdalanýshy «ILIN» kompanııasynyń dırektory Inna Aman, «Operator ROP» seriktestiginiń bas dırektory Medet Qumarǵalıev sóz sóıledi.
Senat depýtattary úkimet saǵatynyń qorytyndysy boıynsha Úkimetke jiberiletin usynymdardy ázirledi.
