Darıǵa Nazarbaeva Túrkııa Uly Ulttyq jınalysynyń tóraǵasymen telefon arqyly sóılesti
M.Shentop D.Nazarbaevany Naýryz merekesimen ári Senat basshysy bolyp saılanýymen quttyqtady jáne onyń Qazaqstan halqynyń ıgiligi jolyndaǵy qyzmetinde tabysqa jetýine tilektestigin bildirdi. Ol ekijaqty yntymaqtastyqty odan ári nyǵaıtýǵa senim artty jáne Senat Tóraǵasyna Túrkııaǵa saparmen barýǵa shaqyrdy.
D.Nazarbaeva jyly quttyqtaýlar úshin alǵysyn jetkizip, «Elbasynyń jańǵyrtýǵa baǵyttalǵan jolyn jalǵastyrý - basty mindet» ekenin atap ótti. Senat Tóraǵasy M. Shentopty halyqty áleýmettik qoldaý, ekonomıkalyq ósý jáne ınvestıtsııalar tartý máselelerine basa nazar aýdarylǵan Qazaqstannyń damý strategııasy týraly jan-jaqty habardar etti.
Taraptar ekijaqty yntymaqtastyq máselelerin, atap aıtqanda, parlamentaralyq únqatysýdy nyǵaıtý máselelerin talqylady. Senat Tóraǵasy Túrkııa Uly Ulttyq Jınalysynyń Tóraǵasyn 23-24 qyrkúıekte Nur-Sultan qalasynda ótetin Eýrazııa elderiniń parlamentteri tóraǵalarynyń kezdesýine shaqyrdy. «Bizde kóptegen josparlar bar, olardy nátıjeli iske asyrý úshin jumys isteımiz. Men Túrkııanyń órkendeýin, Sizderdiń Prezıdentińiz Redjep Taıyp Erdoǵanǵa jáne búkil túrik halqyna tabys tileımin. Túrkııa - qýatty memleket jáne barlyq qıyndyqtardy jeńedi», - dep atap ótti D.Nazarbaeva.
M.Shentop Qazaqstan Respýblıkasynyń Tuńǵysh Prezıdenti N.Nazarbaevtyń Qazaqstannyń qalyptasýy men tabysty damýyndaǵy jetekshi róline joǵary baǵa berdi, sondaı-aq Qazaqstan-Túrkııa qatynastaryn nyǵaıtýǵa qosqan jeke úlesi úshin alǵys aıtty.