Darıǵa Nazarbaeva T72 «tankisimen» oq atty
Depýtattardy atalǵan áskerı ınstıtýt basshysy polkovnık Serik Asanov qarsy alyp, oqý ornynyń tarıhy men búgingi ahýalyn baıandap berdi.
«Qurlyq áskerleriniń áskerı ınstıtýty 1970 jyly qurylǵan. 2003 jyly QR Úkimetiniń №1080 qaýlysymen QR QK Almaty joǵary áskerı ýchılışesi Qurlyq áskerleriniń áskerı ınstıtýty bolyp ózgertildi. Oqý ornynyń basty mindeti - qurlyq áskerleriniń qurylymdaryna joǵary mamandandyrylǵan ofıtserlerdi ázirleý. Instıtýt ofıtserlerdi 14 mamandyq boıynsha daıyndaıdy», - dedi Serik Asanov.
Instıtýt basshysynyń aıtýynsha, oqý orny zamanaýı oqý-materıaldyq bazamen, tehnıkalyq oqý quraldarymen tolyqtaı qamtamasyz etilgen.
«1000-ǵa jýyq kýrsant qazir bilim alyp jatyr. Jyl saıyn 400 adam qabyldaımyz. QR Qorǵanys mınıstrligi tarapynan oqý bazasyn kúsheıtýge barynsha kómek kórsetilip keledi. Qazirgi ýaqytta qorǵanys salasynyń 70 paıyzy bizdiń túlekterimiz. Bizdiń kýrsanttarymyz tájirıbe almasý úshin AQSh-qa, Reseıge barady. Birqatar mamandyqtar boıynsha Túrkııa, Qytaı, Reseıde kýrsanttar bilim alyp jatyr», - dedi polkovnık Asanov.
Instıtýt basshysy oqý ornyna ózge elderden kelip bilim alatyndar bar ekenin aıtty.
«Qazaqstan azamattarymen qatar, Tájikstan men Qyrǵyzstannan kelip oqyp jatyr. Qazirgi ýaqytta sheteldik 100 kýrsant bar. Jalpy, ınstıtýt qurylǵaly ózge eldiń 200 azamaty bilim alyp shyqty. Jalpy qurylǵaly beri oqý orny 17 myń ofıtser daıyndady. Instıtýt aýmaǵy 7 gektar jerdi alyp jatyr. Qazirgi ýaqytta bizdiń túlekterdiń ishinen shyqqan 70 general bar. Tájikstan da bizdiń túlekterdi asa joǵary baǵalaıdy», - dedi ol.
Instıtýt basshysyn tyńdaǵan Darıǵa Nazarbaeva jetistikteri maqtanýǵa turarlyq ekenin aıtty.
«Instıtýtqa bárimiz tań qalyp jatyrmyz. Qural- jabdyqtarmen 100 paıyz qamtylǵan. Naǵyz áskerı ınstıtýt dese bolady. Bıyl osy oqý ornyna túsýge bir orynǵa 10 adam talasqan eken.Aýyldan jastar kelip oqıdy. Áskerı bilim alyp, 4 jyl oqyǵannan keıin qaıda jumysqa ornalasatynyn biledi», - dedi Darıǵa Nazarbaeva. 
Instıtýt jumysyn aralaý barysynda Darıǵa Nazarbaeva «T72, T72B» tankileriniń maketindegi avtomattandyrylǵan atý quralymen nysanany kózdep, birneshe oq atty.
«Osyndaı qurylǵylar arqyly qarajatty únemdeýge bolady. Biraq polıgonda oqý, atý jattyǵýlarynan ótý - ol múlde basqa. Munda oıyn avtomatynda otyrǵandaı kúıde boldym», - dedi Darıǵa Nazarbaeva.
QR Halyq qaharmany, Senat depýtaty Talǵat Musabaev Darıǵa Nazarbaevanyń bul jattyǵýyn áskerı adam retinde joǵary baǵalady.
«Darıǵa NursultanqyzyT72 oqý-jattyǵý tankisiniń kabınasyna kirip, oq atty. Jaqsy nátıje kórsetti. Úlgili kýrsanttyń tapsyrmasyn oryndady, ony kez kelgenimiz birden jasaı almas edik. Birinshi ret otyryp turǵan adam mundaı nátıje kórsetkeni, onyń negizi bar ekenin kórsetedi. Komıtet tóraıymynyń ózi kelip, jaǵdaıdy kózimen kórýi bul jaqsy dúnıe», - dedi Talǵat Musabaev.
Talǵat Musabaev ınstıtýtqa deıin shekara zastavasynda, «Qorǵas» keden beketinde bolǵanyn aıtty.
«Biz keshe shekara zastavasynda bolyp, «Qorǵastaǵy», Jarkenttegi shekarashylardyń jaǵdaıymen tanystyq. Búgin qurlyq áskerleriniń áskerı ınstıtýtyna kelip otyrmyz. Bizdiń maqsatymyz - áskerı mekemelermen tanysý. Biz qorǵanys salasyn tolyǵymen qamtamasyz etýimiz kerek»,- dedi Talǵat Musabaev.
Aıta keteıik, oqý orny jyl saıyn 400 kýrsant qabyldaıdy. Aqyly oqý túri joq. Orta mektep bitirgen túlekter UBT nátıjesimen qosymsha emtıhandar tapsyrady. 
