Darıǵa Nazarbaeva shyǵarmashyl qaýymdy qazaq komıksin damytýǵa shaqyrdy
«Búgin biz memlekettik tildi odan ári damytatyn jumysty qolǵa alyp otyrmyz. Nursultan Nazarbaev qorynyń jumysyndaǵy negizgi baǵyttardyń biri – memlekettik tildi damytý. Qordyń quryltaıshysy da muny basa tapsyryp otyr. Biz úlken taldaý júrgizdik. Mektepke deıingi, mektep jasyndaǵy balalarǵa, jasóspirimderge arnap jasalǵan qazaq tilindegi sapaly dúnıeler óte az. Zamanaýı ertegiler, mýltıplıkatsııalar joq dese de bolady. Jas býynǵa arnalǵan kitaptar, tarıhı dúnıeler, fılmder de joq. Jalǵyz Balapan arnasy osynyń báriniń ornyn toltyrýǵa tyrysyp jatyr. Biraq onyń da damýyna úlken qoldaý kerek. Onyń ishinde áleýeti zor jeke áriptesterdiń ınvestıtsııasy qajet. Sondyqtan biz osyndaı salmaqty sharýany qolǵa aldyq», - dedi Darıǵa Nazarbaeva QR Tuńǵysh Prezıdent – Elbasy Nursultan Nazarbaev mýzeıinde ótken «Uly dala ańyzy» atty qazaq komıksteriniń tusaýyn kesip turyp.
Onyń aıtýynsha, qazaq tildi sapaly kontenttiń az kezinde qalaly ortada ósip jatqan, ýrbanızatsııalanǵan balalarǵa memlekettik tildi úıretý ońaı bolyp otyrǵan joq.
«Úıimizde qazaqsha sóılesip, balalarymyzdy qazaqsha balabaqshalarǵa, qazaq synyptary men mektepterine berip jatamyz. Biraq bilim oshaǵy men úıden tys jerde orys tiliniń úlesi áli de basym. Tili qazaqsha shyqqan balalar orys tilin óte tez meńgerip ketip jatyr. Ýaqyttyń shyndyǵy osy bolyp tur. Qazaq tili jas býynnyń tili bolyp qalyptasýy úshin orta kerek. Ol orta balalardyń ana tiline degen qyzyǵýshylyǵyn tereńnen qozǵap, súıispenshilik qalyptastyrý kerek. Balalar úshin tildik orta degen birinshi kezekte kitaptar bolýy tıis. Qazir balalar kitap oqymaıdy dep jıi aıtylady. Men onymen kelispeımin», - degen qor dırektory balanyń qandaı da bir tendentsııaǵa eltýi otbasyndaǵy ortasyna da baılanysty ekenin eske saldy.
«Bizge balalarǵa arnalǵan mýltıplıkatsııalar, baǵdarlamalar, festıvalder kerek, qazaq anımatsııasyn damytýǵa ınvestıtsııa kerek. Biz bul isti komıksterden bastaýdy jón kórdik. Ol komıksterdiń bastaýynda ulttyq kóne ańyzdar men tarıhı shyǵarmalar tur. Endi osylardy tolyqtyryp, jalǵastyrý úshin talantty adamdardy ortaq iske atsalysýǵa shaqyramyz. Ol adamdardyń bizge jańa, zamanaýı, sońy jaqsylyqpen túıindeletin, balanyń sanasyna ádildik pen izgilik, meıirim men sulýlyq, shynaıy mahabbat árdaıym jeńetinine sendire alatyn ertegiler ákelýi kerek. Búgingi kórme osy úlken istiń bastaýy ǵana», - dedi Darıǵa Nazarbaeva.