Darıǵa Nazarbaeva Shvetsııa Koroldiginiń baıqaýshysy K. Harstedpen kezdesti
NUR-SULTAN. QazAqparat - QR Parlamenti Senatynyń tóraǵasy Darıǵa Nazarbaeva Shvetsııa Koroldiginiń baıqaýshysy, Elshi, shved Úkimetiniń Soltústik Koreıa jáne Mıanma máseleleri jónindegi arnaýly ýákili K. Harstedpen kezdesti. Bul týraly Senattyń baspasóz qyzmeti habarlady.
Senat basshysy Qazaqstan Respýblıkasy Prezıdentiniń kezekten tys saılaýyna baıqaýshy retinde qatysqany úshin alǵys bildirdi. Ol saılaý naýqany ashyq ótkenin jáne saılaýǵa monıtorıng júrgizý úshin barlyq jaǵdaı jasalǵanyn atap ótti. Kezdesýde taraptar túrli baǵyttar boıynsha ekijaqty yntymaqtastyqty nyǵaıtýdy kózdeıtinine toqtaldy.
Ótken jyldyń mamyr aıynda «Qazatomónerkásip» UAK men shvedtik «Vattenfoll» energetıkalyq kompanııasy arasyndaǵy kelisimshart boıynsha qazaqstandyq ýran jetkizilgen bolatyn. Qazaqstandyq ónim úshin shved naryǵy osylaı ashylǵan edi.
Senat basshysynyń pikirinshe, ındýstrııa, IT jáne jasyl tehnologııalar, ekotýrızm ózara is-qımyldyń keleshegi zor baǵyttary bolýy yqtımal.
Kezdesý barysynda halyqaralyq kún tártibindegi jahandyq máseleler talqylandy. Senat basshysy K.Harstedtiń Shvetsııa úkimetiniń Soltústik Koreıa men Mıanma máseleleri jónindegi arnaýly ókili retindegi belsendi qyzmetin atap ótti.
«KHDR-ny únqatysýǵa tartý jónindegi Sizdiń kúsh-jigerińizge qoldaý bildiremiz, birlesip jumys isteıtin yqtımal alań retinde Nur-Sultan qalasyn, atap aıtqanda, Qazaqstannyń Tuńǵysh Prezıdenti qoryn usynamyz, onda bitimgershilik jónindegi qyzmette mol tájirıbesi bar mamandar jumys isteıdi», - dedi D.Nazarbaeva.
