Darıǵa Nazarbaeva Senattyń bıýro otyrysyn ótkizdi
NUR-SULTAN. QazAqparat - Búgin Darıǵa Nazarbaevanyń tóraǵalyq etýimen bolǵan Parlament Senaty bıýrosynyń otyrysynda Palatanyń 11 sáýirde bolatyn otyrysynyń kún tártibi belgilendi, dep habarlaıdy joǵary palatanyń baspasóz qyzmeti.
Senatorlar halyqaralyq úsh qujatty: Qazaqstan men QHR úkimetteri arasyndaǵy Qytaı Halyq Respýblıkasynyń jeńildikti kredıt berýi týraly negizdemelik kelisimdi; 1995 jylǵy 23 jeltoqsandaǵy Qazaqstan Respýblıkasy men Reseı Federatsııasy arasyndaǵy Baıqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly kelisimge ózgeris engizý týraly hattamany; Qazaqstan men Tájikstan úkimetteri arasyndaǵy Óteýsiz áskerı-tehnıkalyq kómek kórsetý týraly kelisimdi ratıfıkatsııalaý týraly zań jobalaryn qaraıtyn boldy. Senatorlar nazaryna sondaı-aq «Qazaqstan Respýblıkasynyń keıbir zańnamalyq aktilerine Qazaqstan Respýblıkasy ortalyq jáne (nemese) jergilikti atqarýshy organdarynyń fýnktsııalaryn básekeles ortaǵa berý máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobalary usynylatyn boldy.
Bıýroda Májilisten túsken zań jobalary Palata komıtetterine bólinip berildi. Halyqaralyq qatynastar, qorǵanys jáne qaýipsizdik komıteti «Kaspıı teńizinde tosyn oqıǵalardy bolǵyzbaý týraly kelisimdi ratıfıkatsııalaý týraly» jáne «Qazaqstan Respýblıkasy men Reseı Federatsııasy arasyndaǵy 2013 jylǵy 24 jeltoqsandaǵy Qazaqstan Respýblıkasy men Reseı Federatsııasy arasyndaǵy áskerı-tehnıkalyq yntymaqtastyq týraly shart sheńberinde beriletin áskerı maqsattaǵy ónimniń bolýyn jáne nysanaly paıdalanylýyn baqylaýdy júzege asyrý tártibi týraly kelisimdi ratıfıkatsııalaý týraly» zań jobalary boıynsha bas komıtet bolyp belgilendi.
