Darıǵa Nazarbaeva Senat janyndaǵy Jastar keńesiniń basty mindetterin atady
NUR-SULTAN. QazAqparat – Qazaqstan Respýblıkasy Parlamenti Senaty janyndaǵy Jastar keńesiniń alǵashqy otyrysy bolyp ótti, dep habarlaıdy QazAqparat tilshisi.
Qazaqstan Respýblıkasy Parlamenti Senaty tóraǵasy Darıǵa Nazarbaeva Qazaqstan Respýblıkasy Parlamenti Senatynyń janyndaǵy Jastar Keńesi otyrysynda sóz sóılep, jastar men jastar saıasaty memleketimizdiń árdaıym basty nazarynda ekenin atap ótti. Onyń aıtýynsha, munyń demografııalyq sebebi bar, óıtkeni elimizde árbir besinshi qazaqstandyq – 14 pen 29 jas aralyǵyndaǵy jastar.
«Jas urpaq - eldiń progresi men damýynyń negizgi qozǵaýshy kúshi. ıAǵnı jastarǵa jaqsy bilim alýǵa, zamanaýı kásibı daıarlyqtan ótýge, ózin-ózi damytýǵa, Otanymyzdyń ıgiligi úshin jumys isteýge barlyq múmkindikter berilýi kerek. Elbasy men Prezıdent jastarmen jumys isteýge jáne jańa urpaqty tárbıeleýge qanshalyqty kóńil bóletinin kórip otyrmyz. Ótken jyl Jastar jyly dep jarııalandy, al bıyl - Eriktiler jyly. Bul jastardyń bastamalaryn qoldaýǵa arnalǵan ártúrli baǵdarlamalarǵa qosymsha serpin berip, memlekettik saıasattyń tıimdiligin kórsetedi. Memlekettiń qoldaýy kópshilikke túsinikti bolyp, nátıjeleri halyqqa anyq kórinýi kerek», - dedi Darıǵa Nazarbaeva.
Senat tóraǵasy eń aldymen, keńes týraly jáne onyń aldyna qoıǵan mindetterin atady.
«Jastar keńesi Parlament Senatynyń konsýltatıvtik-keńesshi organy jáne ol jastar saıasaty salasyndaǵy zańnamany jetildirý máselelerin qarastyrady. Keńesti qurý týraly sheshim Senat Bıýrosynyń biraýyzdan qoldaýymen qabyldandy, Keńes týraly ereje jáne onyń negizgi jumys jospary bekitildi. Keńes quramyna Parlament depýtattary, oblystyq máslıhattar depýtattary, memlekettik qyzmetkerler, úkimettik emes jastar uıymdarynyń, qoǵamdyq birlestikterdiń ókilderi kirdi. Keńes is júzinde qandaı qyzmet atqarady? Memlekettiń, mınıstrlikter men vedomstvolardyń jastar saıasatyn júzege asyrýda atqaryp jatqan jumystary týraly bárimiz bilemiz. Memleket bóletin qarajat kólemi men ony jumsaıtyn baǵdarlamalarda belgili. Biraq, sonymen birge biz eldegi kóptegen jastarǵa qatysty máseleler sheshilmeı, tek jyldan jylǵa problema kóbeıip barady. Aýyldan qalaǵa kelgen jastardyń áleýmettik beıimdelý máselesi, jumyssyzdyq problemasy ótkir másele kúıinde qalyp otyr», - dedi ol.
Senat tóraǵasynyń pikirinshe, keńestiń mindeti - turaqty jumys alańyna aınalý. Onda qoǵamdastyqtyń, atqarýshy bılik pen zań shyǵarý organdarynyń, oblystyq máslıhat depýtattarynyń qatysýymen máseleler talqylanady.
«Qazir «Netvorkıng» uǵymy jastarǵa óte jaqyn. Osy Jastar Keńesi sizdermen ashyq pikir almasyp, baılanys ornatatyn, tyń ıdeıalaryńyzdy birge talqylaıtyn alań bolady dep senemin. Senat janyndaǵy Jastar keńesin bos áńgimeler men jaqsy sózder aıtyp ǵana qoıatyn jınalysqa aınaldyrmaý bizdiń ortaq mindetimiz. Jastar keńesi óte jaqsy áleýetke ıe jáne bizdiń bolashaǵymyz úshin jumys isteıtin úlken alańǵa aınalatynyna senimdimin», - dedi Darıǵa Nazarbaeva.
