Darıǵa Nazarbaeva reseılik senator Konstantın Kosachevpen kezdesti
NUR-SULTAN. QazAqparat - Parlament Senatynyń Tóraǵasy, Eýrazııalyq medıa forýmy Uıymdastyrý komıtetiniń tóraǵasy Darıǵa Nazarbaeva men Reseı Federatsııasy Federatsııa Keńesi Halyqaralyq ister komıtetiniń tóraǵasy Konstantın Kosachev álemdik medıa keńistigindegi Eýrazııalyq medıa forýmnyń rólin talqylady. Bul týraly Senattyń baspasóz qyzmetine silteme jasap QazAqparat habarlaıdy.
Reseılik senator forým álemdik jáne aımaqtyq aýqymdaǵy ózekti máselelerdi talqylaýǵa qajetti pikirtalas alańyna aınalǵanyn atap ótti.
«Forým ósip-órkendep, damý ústinde, sany jaǵynan da, qatysýshylar deńgeıi jaǵynan da, pikirsaıystar aýqymy jaǵynan da qýatty sharaǵa aınalyp keledi», - dep atap ótti ol. EAMF aýqymy keń, suranysqa ıe kún tártibin órbite túsedi, dep esepteıdi Federatsııa Keńesi komıtetiniń tóraǵasy.
D. Nazarbaeva Reseı Federatsııasy Federatsııa Keńesiniń Tóraǵasy Valentına Matvıenkonyń EAMF qatysýshylaryna arnalǵan quttyqtaý sózi men forýmǵa qatysqany úshin K.Kosachevke alǵys aıtty. Quttyqtaýda «ózekti máseleler jónindegi forýmnyń pikiri Eýrazııa aıasynan tys jerlerde estiletinine» senim bildirilgen bolatyn.
Taraptar ózara tıimdi yntymaqtastyqtyń teńdesi joq áleýetin atap ótti. Parlamentaralyq únqatysý týraly aıta kelip, taraptar Parlament Senaty men Federatsııa Keńesiniń salalyq komıtetteri arasyndaǵy yntymaqtastyqtyń tıimdi sıpatyna toqtaldy jáne Qazaqstan Respýblıkasy men Reseı Federatsııasy parlamentteriniń joǵarǵy palatalary arasyndaǵy Yntymaqtastyq jónindegi komıssııanyń jumysy nátıjeli bolyp kele jatqanyn atap ótti. Komıssııanyń 14-shi otyrysy 24-25 mamyrda Almatyda ótedi.
K. Kosachev sondaı-aq Senat basshysyn Reseı Federatsııasyna saparmen kelýge shaqyrdy.
